چھوٹے بچے اچھائی اور بُرائی کی تمیز سے نا آشنا ہوتے ہیں اور انہیں غلط کاموں سے روکنا ماں باپ کے فرائض میں شامل ہے کیونکہ یہ غلط کام بُری عادات کی صُورت میں اُن کی ساری زندگی کو متاثر کر سکتے ہیں، اس آرٹیکل میں بچوں کی 10 ایسی عادات کو شامل کیا جارہا ہے جو جہاں اُن کی صحت تباہ کرتیں ہیں وہاں اُن کے اخلاق بھی متاثر کرنے کا باعث بن سکتی ہیں۔

عادت کیسے بنتی ہے

کوئی چیز اُس وقت عادت بن جاتی ہے جب اُسے شعوری اورلاشعوری طور پر بار بار دہرایا جاتا ہے اورچھوٹے بچوں میں بُری عادات کو اگر وقت پر ٹوک کر اچھے طریقے سے منع کر دیا جائے تو ان سے بچوں کی جان چُھڑائی جا سکتی ہے۔

انگلی چُوسنے کی عادت

بعض اوقات چُوسنی استعمال کرنے والے چھوٹے بچوں میں انگوٹھا یہ انگلی چُوسنے کی عادت پیدا ہوتی ہے جو کہ عام طور پر وقت کیساتھ بڑا ہونے سے خودبخود ختم ہوجاتی ہے مگر ایسا بھی ہوتا ہے کہ یہ عادت اُن کے بڑے ہونے کیساتھ ساتھ بڑتی چلی جائے اور اس صُورت میں جہاں یہ ہاتھوں پر موجود جراثیموں کو اُن کے پیٹ میں لیجا کر صحت خراب کرتی ہے وہاں اُن کے دانتوں کو ٹیڑھا کر سکتی ہے جسے سے اُن کی شخصیت بھی متاثر ہوتی ہے۔

دیر سے سونا

چھوٹے بچے عام طور پر روزانہ 11 سے 13 گھنٹے کی نیند لینے کے عادی ہوتے ہیں اور اگر انہیں وقت پر نہ سُلایا جائے تو دیر سے سونے سے ان میں چڑچڑا پن، سُستی، کاہلی اور توجہ کا پھیرنا جیسی عادات شامل ہونا شروع کر دیتی ہیں جو اخلاق اور صحت دونوں کو متاثر کرتی ہیں۔

اونچا بولنا اور جھگڑنا

بچے جو دیکھتے ہیں وہی سیکھتے ہیں اور اگر گھر کے بڑے اونچی آواز میں جھگڑا کرنے یا غلط زبان بچوں کے سامنے استعمال کرنے کے عادی ہیں تو یہ چیز بچوں کی شخصیت میں بھی شامل ہوجاتی ہے جسے بعد میں ٹھیک کرنا ایک مُشکل کام بن جاتا ہے۔

ٹی وی کے سامنے بیٹھ کر کھانا

عام طور پر مائیں چھوٹے بچوں کو کھانا دیکر ٹی وی کے سامنے بیٹھا دیتی ہیں تا کہ وہ اُنہیں تنگ کیے بغیر اپنے کارٹون وغیرہ میں مشغول ہوکر کھانا کھا لیں۔

ایک تحقیق کے نتائج کے مُطابق ایسے بچے جو ٹی وی دیکھنے کیساتھ کھانا کھاتے ہیں اُن میں موٹاپا پیدا ہونا شروع ہوجاتا ہے کیونکہ وہ ٹی وی دیکھنے میں اتنا مشغول ہوتے ہیں کہ اُن کا دماغ پیٹ بھرنے کی صُورت میں اُنہیں سگنل نہیں دے پاتا چنانچہ وہ زیادہ کھانا کھاتے ہیں اور پھر یہ بُری عادت بڑے ہوکر اُن کے لیے بڑے مسائل پیدا کرتی ہے۔

فاسٹ فُوڈ

بازار میں بکنے والا فاسٹ فُوڈ بچوں کی من پسند غذا ہے جسے کبھی کبھار کھانا تو ٹھیک ہے مگر اگر بچوں کو یہ کھانا اکثر کھلایا جانے لگے تو پھر وہ کوئی اور چیز کھانے میں پسند نہیں کرتے اور صحت کے لیے انتہائی نقصان دہ فاسٹ فُوڈ ہی کھانے کو مانگتے ہیں۔

بچوں کی اس بُری عادت کو ختم کرنے کے لیے ماؤں کو چاہیے کہ گھر میں مختلف طرح کے کھانے پکائیں جو دیکھنے میں بھی خوبصورت لگتے ہوں اور اگر بچے کسی کھانے کو ناپسند کرتے ہیں تو ایسے کھانے کا کوئی متبادل کھانا جو صحت کے لیے مُفید ہو اُن کی خوراک میں شامل کریں۔

موٹر سائیکل کے آگے یا گاڑی کی فرنٹ سیٹ

ہمارے مُلک میں عام رواج ہے کہ چھوٹے بچوں کو موٹر سائیکل کے آگے بیٹھا کر سواری کی جاتی ہے جو کہ انتہائی خطرناک ہے کیونکہ ذرہ سی ہوا لگنے سے بچوں کو نیند آجاتی ہے اور ایسی صُورت میں وہ ایک طرف جھول جاتے ہیں اور اُنکے گرنے کا خدشہ بڑھ جاتا ہے اسی طرح گاڑی میں بچوں کا آگے والی سیٹ پر کسی کی گود میں بیٹھنا جہاں ڈرائیور کے لیے بائیں بیک مرر کا ویو بند کر دیتا ہے وہاں بچے کو مضبوطی سے پکڑے نہ ہونے کی صُورت میں بریک لگنے سے بچہ ڈیش بورڈ کیساتھ ہٹ کر سکتا ہے۔

بچے کو موٹر سائیکل ہرگز ہرگز آگے بیٹھنے کی عادت مت ڈالیں اور گاڑی میں بچے کو بے بی سیٹ پر پیچھے بیٹھا کر سیٹ بلٹ ضرور باندھیں۔

موبائل فون اور کمپیوٹر

موبائل فون وغیرہ اور کمپیوٹر وغیرہ اپنے دلچسپ اور رنگ برنگے پروگرامز کی وجہ سے بچوں کو فوراً اپنی طرف متوجہ کرتے ہیں اور بڑے یہ دونوں چیزیں بچوں کو اس لیے دے دیتے ہیں کہ وہ آرام سے بیٹھ جائیں گے۔

کمپیوٹر اور موبائل کی سکرین سے نکلنے والی بیلو لائٹ بچوں کے لیے انتہائی نقصان دہ چیز ہے جو اُنکی آنکھوں کو متاثر کرتی ہے اس لیے کوشش کریں کہ چھوٹے بچوں کو ان دونوں چیزوں کی عادت نہ پڑے، چھوٹے بچوں کو کھیلنے کے لیے سمارٹ فونز کی بجائے کھلونے وغیرہ لیکر دیں۔

گندی جگہ پر کھیلنا

مٹی وغیرہ یا گندی جگہ پر کھیلنا بھی بچوں کی صحت کو انتہائی نقصان پہنچا سکتا ہے کیونکہ بچے ایسی جگہ پر کھیل کر اپنے ہاتھ گندے کرتے ہیں اور پھر بغیر سوچے سمجھے ان ہاتھوں کو مُنہ میں ڈال لیتے ہیں جس سے ان کے پیٹ میں جراثیم وغیرہ آسان سے داخل ہوتے ہیں اور بیماری پیدا کرتے ہیں۔

بچوں کا W کی پوزیشن میں بیٹھنا

زمین پر بیٹھ کر کھیلنے کے دوران کُچھ بچے W کی پوزیشن میں بیٹھنا شروع کر دیتے ہیں کیونکہ ایسے بیٹھنے سے اُن کو آرام محسوس ہوتا ہے، بچوں کے ماہرین کا کہنا ہے کہ یہ پوزیشن اُن کی ٹانگوں کے سٹرکچر کو خراب کرنے کا باعث بنتی ہے اس سے اُن کی ٹانگوں کے جوڑ خراب ہوتے ہیں اور پیٹ کے مسلز کمزور ہوجاتے ہیں۔

ڈبلیو کی پوزیشن پر بیٹھنے سے بچوں کی گردن، کمر اور کاندھوں پر زیادہ وزن پڑتا ہے اور اگر یہ پوزیشن اُن کی عادت بن جائے تو اس سے ٹانگوں کی ہڈیوں کے ٹیڑھے ہونے کا خطرہ بڑھ جاتا ہے۔