ہمارے بہت سے کھانے خاص طور پر فاسٹ فُوڈ اور جنک فُوڈ وغیرہ ہماری زندگی کے اوقات میں بے راہروی، تمباکو نوشی اور ہماری فضائی آلودگی اور بیشمار ایسے عوامل ہیں جو ہمارے جسم میں زہریلے مادوں کو پیدا کرتے ہیں اور یہ زہریلے مادے ہمارے اندرونی اعضا کو بے حد نقصان پہنچاتے ہیں اور ہماری صحت کو برباد کر دیتے ہیں اور ہمیں وقت سے پہلے بوڑھا بنا دیتے ہیں۔

جسم سے زہریلے مادوں کو خارج کرنے کی ڈیوٹی قُدرت نے جگر کے سُپرد کر رکھی ہے اور جگر کا کام ان زہریلے مادوں کو صاف کرنا ہے لیکن اگر ان مادوں کی مقدار بڑھتی ہے تو جہاں جگر کو زیادہ کام کرنا پڑتا ہے اور یہ کام اُسے آہستہ آہستہ کمزور کر دیتا ہےاور وہ ان ٹاکسنز کو پُوری طرح صاف نہیں کر پاتا اور یہ مادے ہمارے اعضا کو نقصان پہنچانا شروع کر دیتے ہیں اور پھر کئی دائمی بیماریوں کا باعث بنتے ہیں۔

اس آرٹیکل میں ہم جسم سے فاضل مادوں کو خارج کرنے والے چند ایسے بہترین ٹوٹکوں کا ذکر کریں گے جنہیں طبیب حضرات صدیوں سے استعمال کروا رہے ہیں اور اب میڈیکل سائنس بھی ان ٹوٹکوں کے نتائج کو تسلیم کرتی ہے۔

نمبر 1 ادرک اور اُسکی چائے

ادرک ایک اکسیر ہے جس میں صحت کے لیے کئی خوبیاں شامل ہیں اور انہیں خوبیوں میں سے ادرک کی ایک خوبی یہ ہے کہ یہ جسم سے فاضل مادوں کو خارج کر کے جگر کو تقویت دیتا ہے اور جگر کے کام کرنے کی صلاحیت کو بڑھاتا ہے۔

آپ ادرک کو آسانی سے اپنی خوراک کا حصہ بنا سکتے ہیں خاص طور پر ادرک کا قہوہ بنانا بھی آسان ہے اور اس کے دلچسپ ذائقے کی وجہ سے اسے پینا بھی۔

نمبر 2 شہد اور لیموں کا پانی

جسم سے فاضل مادوں کو خارج کرنے کے لیے شہد اور لیموں کا نیم گرم پانی صدیوں سے استعمال کیا جارہا ہے اور یہ فاضل مادوں کو خارج کرنے کے لیے کسی اکسیر سے کم نہیں۔

صبح نہار مُنہ اور شام کو کھانے سے پہلے ایک گلاس نیم گرم پانی میں ایک چمچ شہد اور ایک لیموں شامل کر کے اسے پینا شروع کریں اور اس عمل کو روزانہ کی روٹین کا حصہ بنائیں چند ہی دنوں میں آپ کو پتہ چل جائے گا کہ یہ آپ کی صحت پر کتنے اچھے اثرات مرتب کر رہا ہے۔

نمبر 3 لہسن

اینٹی وائرل، اینٹی بیکٹریل، اینٹی فنگل، اینٹی آکسائیڈینٹ اور بیشمار دُوسری خوبیوں کا حامل لہسن کسی تعارف کا محتاج نہیں اور جسم سے فاضل مادوں کو خارج کرنے کے لیے لہسن کا کوئی ثانی نہیں اسے اپنی خوراک میں شامل کریں خاص طور پر نہار مُنہ ایک لہسن کی تڑی باریک کاٹ کر پانی سے نگل لیں اور یہ عمل کم از کم 30 دن تک بغیر چُھٹی کیے جاری رکھیں یہ آپ کے جسم سے زہریلے مادوں کو خارج کرنے کیساتھ ساتھی صحت پر بیشمار اچھے اثرات مرتب کرے گا۔

نمبر 4 ڈائٹری فائبر

ڈائٹری فائبر جسم سے فاضل مادوں کو خارج کرنے کے لیے انتہائی مدد گار چیز ہے، ڈائٹری فائبر حاصل کرنے کے لیے پھل فروٹس اور سبزیوں کے علاوہ اناج کو اپنی خوراک کا حصہ بنائیں اور اناج کا ایسا آٹا جیسے ریفائن کیا گیا ہو ہرگز استعمال نہ کریں کیونکہ اُس میں سے فائبر نکال لی جاتی ہے۔

نمبر 5 کوار گندل

کوار گندل یا ایلوویرا کا جُوس جسم سے فاضل مادوں کو خارج کرنے کے لیے ایک اکسیر ہے جو خون کو صاف کرتا ہے اور آکسیجن کو جسم کے تمام اعضا تک پہنچنے میں مددگار ثابت ہوتا ہے۔

ایلوویرا کا جوس جہاں زہریلے مادے خارج کرتا ہے وہاں صحت پر اور کئی اچھے اثرات مرتب کرنے کیساتھ ہماری جلد کو تروتازہ اور خوبصورت بنا کر اس پر پڑنے والی جھریوں کو ختم کرتا ہے۔

نمبر 6 سبز چائے کا قہوہ

سبز چائے بیشمار خوبیوں کی حامل ہے یہ جسم سے فاضل مادوں کو خارج کرنے کے ساتھ ساتھ فاضل چربی کو بھی پگھلانے میں مدد کرتی ہےا ور جسم کے اعضا کے لیے تقویت کا باعث بنتی ہے سبز چائے کو اپنی روزانہ کی خوراک کا حصہ بنائیں اور اس سے بہترین نتائج حاصل کرنے کے لیے اسے کم از کم 30 دن صبح شام پینا شروع کریں آپ کو خود پتہ چل جائے گا کہ یہ کیا اثرات مرتب کر رہی ہے۔