Posted by اگر آپ پاکستان کے شمالی علاقہ جات کی سیر کر چُکے ہیں تو وہاں تیز بہتے دریاوں کے کنارے پر پڑے گول اور بضوی شکل کے پتھر جن پر کوئی کنارہ نہیں ہوتا یقیناً آپ کی توجہ کا مرکز بنے ہوں گے اور اُن کی خوبصورتی نے آپ کو اپنی طرف راغب کیا ہوگا لیکن کیا آپ جانتے ہیں کہ یہ پتھر اس شکل میں کیسے وجود پاتے ہیں اور قدرت ان کے کنارے ختم کیوں کر دیتی ہے؟۔
دریا کا بہتا تیز پانی کئی یونیورسل راز آشکار کرتا ہے اور یہ بتاتا ہے کے تیز بہتے پانی کے نیچے چیزوں کی فینینگ ہوتی ہے یعنی اُنکا سائز کم ہوتا ہے اور اسکے نتیجے میں پتھر جہاں ملائم ہوتے ہیں وہاں ان کے کنارے ختم ہو جاتے ہیں اور یہ گول اور بیضوی شکل اختیار کر جاتے ہیں اور اس شکل کو اختیار کرتے ہُوئے انہیں کافی لگتا ہے۔
دریا کے پانی میں پتھر کی شکل تبدیل ہونے میں کتنا وقت درکار ہوتا ہے اس کا صحیح اندازہ لگانا مشکل ہے کیونکہ اس کا دارومدار پانی کے تیزی سے بہاؤ اور پتھر کتنا سخت ہے اس چیز پر ہوتا ہے لیکن جو پتھر زیادہ سخت نہیں ہوتے وہ جلدی ملائم اور گول ہو جاتے ہیں اور سخت پتھر اس شکل کو اختیار کرنے میں اتنا ہی وقت لیتے ہیں۔
گلشیر جب پگھلتا ہے تو یہ اپنے ساتھ چھوٹے بڑے کئی پتھر پانی کیساتھ بہا کر لیکر آتا ہے یہ پتھر جب مسلسل پانی کی موجوں میں پانی کیساتھ حرکت کرتے ہیں تب اپنی ساخت تبدیل کر لیتے ہیں اور ان کی بدلی ہُوئی ساخت جہاں پانی کے بہاؤ کو بہتر بناتی ہے وہاں یہ اپنے نوکیلے کنارے کھو دیتے ہیں جس سے دریا کے اردگرد رہنے والوں کے پاؤں اس سے زخمی نہیں ہوتے اور انہیں دریا کے قریب آمدورفت میں آسانی ہوتی ہے۔
تیز ندی نالوں اور دریاؤں میں رہنے والی مچھلیاں ان پتھروں کے نیچے اپنا مسکن بناتی ہیں اور انڈے دیتی ہیں اور یہ پتھر صرف مچھلیوں کے لیے گھر نہیں بناتے بلکہ دریا کے آس پاس کے لوگ انہیں کنسٹرکشن میں استعمال کرتے ہیں اور اب تو ان پتھروں کو شہروں میں بھی بہت سی تعمیرات میں مضبوطی اور خوبصورتی کے لیے استعمال کیا جا رہا ہے۔
آپ کو یہ جان کر حیرت بھی ہو گی کہ ان پتھروں کو کھانا پکانے کے لیے بھی استعمال کیا جاتا ہے اور جو پتھر سائز میں تھوڑے بڑے ہوتے ہیں انہیں آگ میں گرم کرنے کے بعد ان کے اوپر روٹی پکائی جاتی ہے اور ان پتھروں کا استعمال کھانا پکانے میں بھی کیا جاتا ہے۔
ان پتھروں کو اگر آپ گارڈن اُگاتے ہُوئے استعمال کریں تو آپ کو ملچ کی ضرورت نہیں رہتی کیونکہ مٹی میں ان پتھروں کا استعمال مٹی کے اندر موجود نمی کو جلدی خُشک نہیں ہونے دیتا جس سے پودوں کو تیزی کے ساتھ بڑے ہونے کا موقع ملتا ہے اور ان پتھروں کی موجودگی کی وجہ سے مٹی کی زمین نرم رہتی ہے اور مٹی کے اندر پودوں کے دوست حشرات ان پتھروں کے نیچے اپنا بسیرا کرتے ہیں اور پودوں کو فائدہ دیتے ہیں۔
قدرت کے گہرے رازوں پر غور کرنے سے پتہ چلتا ہے کہ وہ کوئی کام بھی بغیر مقصد کے نہیں کرتی اور دریا کے یہ گول پتھر بھی بغیر مقصد کے پیدا نہیں ہوتے، پانی انہیں اگر ملائم کرکے بیضوی شکل نہ دے تو یہ پانی کے بہاؤ کیساتھ دریا میں بہتے رہیں اس سے یہ جہاں راستے میں آنے والی چیزوں کو نقصان پہنچائیں وہاں کسی ایک جگہ جمع ہوکر دریا کے بہاؤ کو بند کر دیں جس سے سیلاب پیدا ہو جائے لیکن قدرت انہیں کمال مہارت سے ملائم کر کے ان کی شکل ایسی بنا دیتی ہے کہ یہ دریا کے پانی کے نیچے اور کناروں پر جمع ہوکر پانی کو بہنے کا موقع دیتے ہیں اور پانی کے بہنے کے لیے قدرتی ٹریک بنا دیتے ہیں۔