پانی زندگی ہے اور ہمارے جسم کو روزانہ ٹھیک کام کرنے کے لیے مطلوبہ مقدار میں پانی کی ضرورت ہوتی ہے یہ مطلوبہ مقدار کتنی ہونی چاہیے یا بات کئی چیزوں پر منحصر کرتی ہے جن میں عُمر، جنس، جسم کا وزن، موسم، جسمانی مشقت اور جسم کی صحت وغیرہ کا گہرا تعلق ہوتا ہے۔

موسم گرما میں گرمی کی شدت جب بڑھتی ہے تو قُدرت نے ہمارے جسم کو قُدرتی طور پر ٹھنڈا کرنے کے لیے پسینے کا نظام ہمارے جسم کو عطا کیا ہے اور یہ پسینہ ہمارے جسم کو ٹھنڈا کرتا ہے اور جتنا زیادہ پسینہ آئے گا جسم کو اُسی مقدار سے پانی کی ضرورت ہوگی۔

اس آرٹیکل میں ہم 7 ایسے کھانوں کا ذکر کریں گے جو ہمیں جلدی پیاس نہیں لگنے دیں گے اور قُدرتی طور پر جسم کو اندر سے ٹھنڈا رکھیں گے۔

نمبر 1 جو کا دلیہ

اپنے دن کا آغاز جو کے دلیے کے ناشتے سے کریں یہ جہاں صحت کے لیے انتہائی مُفید ہے وہاں یہ ہمارے جسم کو ڈی ہائیڈریٹ نہیں ہونے دیتا کیونکہ جب جو کو دُودھ یا پانی میں پکایا جاتا ہے تو یہ ان لیکوڈز کو بڑی مقدار میں اپنے اندر جذب کر لیتا ہے اور اگر جو کا دلیہ بنانے سے پہلے اسے رات بھر پانی میں بھیگا رہنے دیں تو یہ جہاں بڑی مقدار میں پانی اپنے اندر جذب کرے گاوہاں اس کی افادیت میں اور اضافہ ہوگا اور اسے زیادہ دیر آگ پر پکانا نہیں پڑے گا۔

جو کے دلیے میں اگر آپ رات بھر چیا سیڈز یا اگر چیا سیڈ میسر نہ ہوں تو تخم بالنگا رات بھر بھگو کر دلیے میں شامل کر دیں تو یہ آپ کی صحت پر انتہائی اچھے اثرات مرتب کرے گا اور آپ کے جسمانی نظام کو اندر سے ٹھنڈا کرنے کیساتھ ان میں جذب شُدہ پانی ڈی ہائیڈریٹ ہونے سے بچائے گا۔

نمبر 2 دہی اور دُودھ

ایک تحقیق کے مُطابق دُودھ اور دہی وغیرہ آپ کی پیاس کو پانی کی نسبت زیادہ جلدی ختم کرتے ہیں اور ان کے استعمال کے بعد آپکا جسم زیادہ دیر تک ہائیڈریٹ رہتا ہے کیونکہ ان میں موجود کیلشیم، پروٹین، کاربوہائیڈریٹس اور الیکٹرولائٹس وغیرہ کسی بھی دُوسرے ڈرنک سے زیادہ فائدہ مند ثابت ہوتے ہیں۔

نمبر 3 کاربوہائیڈریٹ کا بدل

ایسے کھانے جن میں ڈرائی کاربوہائیڈریٹ ہوتے ہیں جیسے روٹی، بیکری، پاسٹا، نوڈلز وغیرہ یہ سب پیاس کی شدت میں اضافہ کرتے ہیں اس لیے گرمیوں کے موسم میں ان کھانوں کا نعم البدل استعمال کریں تاکہ آپ کو جلدی پیاس تنگ نہ کرے آپ ان کے نعم البدل کے طور پر سلاد اور پھل وغیرہ استعمال کر سکتے ہیں۔

نمبر 4 سمودیز

مختلف پھلوں اور سبزیوں کو سمودی جسم کو لمبے عرصے تک ہائیڈریٹ رکھتی ہیں اور پانی کی جلدی کمی پیدا نہیں ہونے دیتیں اس کے لیے آپ کوئی بھی سبزی اور پھل استعمال کر سکتے ہیں خاص طور پر سٹرابری، کھیرا، تربوز، خربوزہ، چقندر وغیرہ بہترین کھانے ہیں جو پیاس نہیں لگنے دیتے۔

نمبر 5 تازہ سبزیاں

اگر آپ چاہتے ہیں کہ آپ کو جلدی پیاس نہ لگے تو اپنے کھانے میں تازہ سبزیوں کو شامل کر لیں خاص طور پر اُن سبزیوں کو جنہیں آپ کچا کھا سکتے ہیں، ایسی سبزیاں جہاں اپنے اندر جہاں بیشمار وٹامنز اور منرلز رکھتی ہیں وہاں پانی کی ایک بڑی مقدار ان میں شامل ہوتی ہے جو جسم میں پانی کی کمی کو پُورا کر دیتی ہیں۔

نمبر 6 تیز مصالحہ جات سے اجتناب

یہ بات تو سب ہی جانتے ہیں کہ تیز مصالحے والا کھانا کھانے کے بعد بار بار پیاس لگتی ہے اس لیے سخت گرمی میں ایسے کھانوں سے کنارہ کش ہو جائیں اور اپنے کھانوں میں ایسے سُوپ جن میں ٹماٹر، ادرک، لہسن اور کھیرا وغیرہ شامل ہوں کو شامل کریں۔

نمبر 7 فروٹس کو فریز کر لیں

تازہ پھل صحت کے لیے انتہائی مُفید ہیں اور گرمی میں یہ جسم میں گرمی کی شدت کو کم کرتے ہیں اور اگر آپ تربوز کا جُوس نکال کر اس میں تازہ پھل باریک باریک کاٹ کر انہیں قلفی کی شکل میں جما لیں اور دن میں چند بار چُوس کر کھائیں تو جہاں آپ کو بہت زیادہ مزہ آئے گا وہاں صحت سے بھرپُور یہ قلفیاں آپ کی پیاس کی شدت کو ختم کردیں گی۔