Posted by پاکستان میں گرمیاں اپنے عروج پر ہیں اوربہت سے شہروں میں دُوپہر کے وقت درجہ حرارت 46 ڈگری سے بھی اُوپر چلا جاتا ہے ایسے شدید گرم موسم میں اگر آپ کو کہیں سفر کرنا پڑ جائے تو چند احتیاطی تدابیر کا استعمال آپ کو کسی بڑی پریشانی سے بچا سکتا ہے۔
اس آرٹیکل میں ماہر ڈرائیورز کی طرف سے سخت گرمی میں سفر کرنے کے لیے چند احتیاطی تدابیر کو شامل کیا جارہا ہے تاکہ آپ بھی ان سے مستفید ہو سکیں۔
نمبر 1 ڈی ہائیڈریشن سے بچنے کے لیے پانی
اپنے سفر کے آغاز سے پہلے اس بات کا اطمنان کرلیں کے آپ کے پاس سب مسافروں کے لیے وافر پانی موجود ہے، اپنے ساتھ وافر پانی رکھیں تاکہ راستے میں ڈی ہائیڈریشن سے بچ سکیں۔
نمبر 2 چھوٹے بچوں کی کبھی گاڑی میں تنہا نہ چھوڑیں
آپ جانتے ہیں کہ سخت گرمی میں گاڑی پارک کرنے سے گاڑی کے اندر کا درجہ حرارت بہت زیادہ گرم ہوجاتا ہے اس لیے چھوٹے بچوں کو گاڑی پارک کرنے کی صورت میں گاڑی کے اندر تنہا نہ چھوڑیں کیوں کہ یہ انتہائی خطرناک ہو سکتا ہے۔
نمبر 3 گاڑی کی سروس کروائیں
اگر آپ لمبے سفر پر روانہ ہونے کا ارادہ رکھتے ہیں اور آپ نے پچھلے 6 ماہ سے گاڑی کی سروس نہیں کروائی تو یہ بہت ضروری ہے کے سفر کے آغاز سے پہلے گاڑی کو کسی اچھے مکینک سے سروس کروائیں کیونکہ دوران سفر گاڑی میں خرابی کی صورت میں آپ کے لیے شدید پریشانی پیدا ہو سکتی ہے۔
نمبر 4 بیٹری چیک کریں
زیادہ گرمی میں گاڑی کی بیٹری کا پانی جلد خُشک ہو جاتا ہے اگر آپ کی گاڑی کی بیٹری میں پانی ڈلتا ہے تو لمبے سفر سے پہلے پانی کا لیول چیک کریں کیوں کہ بیٹری اگر خُشک ہوجائے تو وہ آپ کی گاڑی کو کرنٹ دینا بند کر دیتی ہے اور آپ گاڑی سٹارٹ نہیں کر سکتے۔
نمبر 5 ونڈ سکرین صاف رکھیں
تیز دھوپ کی روشنی آپ کی حد نظر کم کر سکتی ہے خاص طور پر اگر سورج گاڑی کی سکرین کے سامنے ہو تو دیکھنے میں پریشانی ہوتی ہے اس لیے گاڑی کی سکرین کو صاف رکھیں تاکہ تیز دھوپ کی صورت میں نقصان سے بچ سکیں۔
نمبر 6 ایمرجنسی کٹ
اپنی گاڑی میں ایمرجنسی کٹ میں پانی، کھانا، جمپر کیبل، اور ٹائر وغیرہ بدلنے کا سامان ضرور رکھیں کیوں کہ تیز دھوپ میں آپ کی گاڑی کا ٹائر گرم ہوجانے کی صورت میں پھٹ بھی سکتا ہے اور ایسی صورت میں آپ کے پاس ٹائر بدلنے کا سارا سامان ہونا بہت ضروری ہے۔
نمبر 7 سفر کی منصوبہ بندی کریں
لمبے سفر سے پہلے اس بات کا خاص خیال رکھیں کہ آپ کا موبائل فون پُوری طرح چارج ہے اور ہنگامی کال کرنے کے لیے اس میں مطلوبہ بیلنس وغیرہ موجود ہے اس کے علاوہ اس بات کا بھی دھیان رکھیں کے آپ کی جیب میں اضافی کیش موجود ہو۔
نمبر 8 پیٹرول
اس بات کا دھیان رکھیں کے گاڑی میں پیٹرول موجود ہے اور ریسرو لائٹ آن ہونے سے پہلے ہی پیٹرول ڈلوائیں تاکہ کسی غیر ضروری پریشانی سے بچ سکیں۔
نمبر 9 کار کولینٹ سسٹم
گاڑی کے ریڈیٹر میں پانی کی بجائے کسی اچھے کولینٹ کو استعمال کریں یہ جہاں آپ کی گاڑی کو ہیٹ اپ ہونے سے محضوظ رکھے گا وہاں انجن کو بہتر کارکردگی دیکھانے میں بھی مدد کرے گا۔
نمبر 10 انجن آئل اور بریک آئل وغیرہ
لمبے سفر سے پہلے اطمنان کر لیں کے گاڑی کا انجن آئل، بریک آئل وغیرہ پُورے ہیں اور اگر کم ہیں تو پُورا کرلیں۔
نمبر 11 کار اے سی
سخت دھوپ میں جب لُو چل رہی ہو تو کار کا اے سی آپ کو لُو لگنے سے محفوظ رکھتا ہے اس لیےلمبے سفر سے پہلے اطمنان کر لیں کے اے سی ٹھیک کام کر رہا ہے۔
نمبر 12 گاڑی کے ٹائر
لمبے سفر سے پہلے تسلی کر لیں کے گاڑی کے ٹائروں میں ہوا پُوری ہے اور بہتر ہے کہ سفر سے پہلے ہوا کا لیول تھوڑا کم رکھیں کیوں کہ ٹائر گرم ہونے کے ساتھ اس میں موجود ہوا گرم ہوکر پھیلتی ہے اور اگر ٹائر کمزور ہو تو ایسی صورت میں وہ پھٹ جاتا ہے۔
نمبر 13 دھوپ کا چشمہ لگائیں
تیز دھوپ کی صورت میں گاڑی ڈرائیو کرنے کے دوران دھوپ کے چشمے کا استعمال کریں تاکہ تیز روشنی سے آنکھوں کو محفوظ رکھ سکیں۔
نمبر 14 دھوپ میں کار پارک کرتے وقت
اگر آپ کو مجبوراً گاڑی دھوپ میں کھڑی کرنی پڑ رہی ہے تو گاڑی کا سٹیرینگ 180 ڈگری پر گُھما دیں تاکہ سٹیرینگ پکڑنے والی جگہ سیدھی دھوپ سے بچ سکے۔