Posted by موسم گرما کی آمد کے ساتھ ہی گرمی کی شدت میں ہر گُزرتے دن کیساتھ اضافہ ہو رہا ہے اور اس بدلتے موسم کا اثر ہماری صحت پر بھی پڑتا ہے اور صحت کے متعلق بہت سی پریشانیاں پیدا ہونا شروع ہو جاتی ہیں، اگر آپ بدلتے موسم کیساتھ گرمیوں میں جسم کو تندرست رکھنا چاہتے ہیں تو گرمی کی بیماریوں کے تدراک کرنے کے طریقوں کو سیکھنا ضروری ہے۔
اس آرٹیکل میں گرمی سے پیدا ہونے والی بیماریوں سے بچنے کے طریقوں کا ذکر کیا جائے گا تاکہ آپ موسم کی شدت سے اپنے جسم کو محفوظ رکھ سکیں اور صحت مند رہ سکیں۔
سب سے پہلے پانی
موسم گرما میں قُدرت نے ہمارے جسم کو قدرتی طور پر ٹھنڈا رکھنے کے لیے ہمارے جسم میں پسینے کا نظام بنایا ہے اور زیادہ گرمی میں زیادہ پسینہ آنے سے جسم میں پانی کی کمی پیدا ہوتی ہے خاص طور پر اُن لوگوں میں جو جسمانی مشقت کے کام کرتے ہیں اور ورزش وغیرہ کرتے ہیں یہ کمی جلدی پیدا ہو سکتی ہے اس لیے ضروری ہے کہ جسم میں پانی کی کمی کو پہچانا جائے۔
جب جسم میں پانی کی پیدا ہوتی ہے تو بار بار پیاس لگتی ہے، معمول سے بہت کم پیشاب آتا ہے اور پیشاب کی رنگت گہری ہو جاتی ہے، جسم بہت جلد تھکاؤٹ کا شکار ہونا شروع ہو جاتا ہے، سر میں درد اور چکر آ سکتے ہیں اور ایسی صُورت میں زیادہ سے زیادہ پانی پینا بہت ضروری ہو جاتا ہے خاص طور پر نمک کی کمی کو پُورا کرنے کے لیے لیموں کی سکنجبین کا استعمال زیادہ کریں اور اس میں نمک ڈال کر پینا شروع کر دیں، نارنجی کا جُوس بھی جسم کو ڈی ہائیڈریٹ ہونے سے بچاتا ہے اسکے ساتھ چائے اور کافی کا استعمال کم کریں اور ہلکے رنگ کے کپڑے پہنیں کیونکہ گہرا رنگ سُورج کی دُھوپ کو اپنے اندر جلدی جذب کرتا ہے اور ایسا کپڑا جلدی گرم ہو جاتا ہے اور دُھوپ میں نکلنے سے پہلے اپنے سر کو سفید یا ہلکے رنگ کپڑے سے ضرور ڈھانپ لیں۔
معدے میں تیزابیت
یہ بیماری بھی گرمی کے موسم کے ساتھ جُڑی ہُوئی ہے اور اس میں معدے میں تیزابیت پیدا ہونی شروع ہوتی ہے جس سے کھٹی ڈکاریں، پیٹ کا بھاری پن، معدے میں جلن، پیٹ درد اور متلی جیسی شکایات بڑھ جاتی ہیں اور ایسی صُورت میں دھنیے کو پانی میں بھگو دیں اور 2 گھنٹے بعد اسکا پانی استعمال کریں اور اسی طرح پودینے کو پانی میں بھگو کر پانی استعمال کرنا شروع کر دیں، املی اور آلو بُخارے کو پانی میں رات بھر بھیگا رہنے دیں اورصُبح اسکا پانی پی لیں اور املی اور الوبُخارے کی گھٹلیاں نکال کر اسے بھی ساتھ کھا لیں یہ آپ کے نظام انہظام کو خراب نہیں ہونے دے گا۔
خُشک ادرک یا ادرک کا پاوڈر اور اس میں تھوڑا کالا نمک شامل کر کے وقفے وقفے سے اس چُورن کا استعمال کرنا بھی تیزابیت کے خاتمے کا باعث بنتا ہے، معدے میں تیزایبت کی صُورت میں سیدھا مت لیٹیں بلکے چارپائی وغیرہ کے سر والی سائیڈ پر چارپائی کے پاؤں کے نیچے اینٹ وغیرہ رکھ کر اسے سرہانے سے اونچا کر لیں اور تیزابیت کی صُورت میں چائے اور کافی سے پرہیز کریں اور کچی لسی وغیرہ کا استعال زیادہ کر دیں۔
سر چکرانے کی صُورت میں
شدید گرمی سے اگر چکر آ رہے ہیں تو ایسی صُورت میں آملے کا شربت آپ کو فوری آرام پہنچائے گا اور ساتھ ہی تُلسی کے پتوں میں چینی مکس کر کے پیسٹ بنا لیں اور اسے پانی میں حل کر کے تھوڑی تھوڑی دیر بعد استعمال کریں یہ جسم سے گرمی کی شدت کو کم کرے گا۔
مزید ہدایات
موسم گرما میں سلاد والی سبزیوں کا استعمال زیادہ کریں خاص طور پر کھیرا کھانا شروع کر دیں کھرےمیں پانی کی ایک بڑی مقدار شامل ہوتی ہے جو جسم کو ڈی ہائیڈریٹ ہونے سے بچاتی ہے اسی طرح اگر گرمی زیادہ لگ رہی ہو تو سینے پر پیاز کے رس سے مالش کریں۔
گرمی میں گرمی دانے بھی جسم میں تلخی پیدا کرتے ہیں ان سے بچنے کے لیے کالا زیرے کا پاؤڈر ناریل کے دُودھ میں مکس کر کے جسم کی مالش کرنا انتہائی فائدہ مند ثابت ہوتا ہے اور ساتھ ہی دھنیے کے پانی میں چینی شامل کرکے پینا بھی جسم کی تلخی کو کم کرنے کا باعث بنتا ہے۔
فود پوائزنینگ
یہ بیماری بھی گرمی کے موسم سے جُڑی ہے اور خاص طور پر برسات کے موسم میں تو پنجاب کے ہسپتالوں میں اس بیماری سے نمپٹنے کے لیے ایمرجنسی نافذ کر دی جاتی ہے اس بیماری سے بچنے کے لیے بازاری کھانا کھانا چھوڑ دیں اور کھانا کھانے سے پہلے، واش روم سے نکلنے کے بعد، پالتو جانوروں کو چُھونے کے بعد اپنے ہاتھوں کو اینٹی بیکٹریل صابن سے دھوئیں، اور موسمی پھل اور سبزیوں کا استعمال بھی اچھی طرح دھو کر کریں تاکہ ان کے اوپر کوئی جراثیم وغیرہ نہ رہ جائے اور اپنی خوراک میں ایسے کھانوں کو شامل کریں جن میں فائبر کی مقدار زیادہ ہو جیسے پھل فروٹس اور سبزیاں۔
نوٹ: فُوڈ پوائزینگ میں فوری طور پر ڈاکٹر سے رجوع کریں کیونکہ یہ بیماری خطرناک ہو سکتی ہے اور جان لیوا ثابت ہو سکتی ہے۔