پاکستان کے بڑے شہروں کی تاریخ جب وہاں درجہ حرارت نقطہ انجماد سے نیچے چلا گیا

سرزمین پاکستان کا مُقام خطہ زمین پر انتہائی اہم ہے جہاں گرمیوں میں آپ کو ایسے علاقے بھی ملیں گے جہاں جون جولائی میں بھی برف باری ہوتی ہے اور سردیوں میں ایسے علاقے بھی ملیں گے جہاں آپ کو گرمی لگنے لگے گی، پاکستان میں آپ کو دُنیا کا شدید ترین ٹھنڈا موسم بھی ملے گا مثال کے طور پر ابھی اگر آپ گوگل پر چیک کریں K2 Weather تو گوگل آپ کو بتائے گا کہ اس وقت کےٹو کے بیس کیمپ پر منفی 47 ڈگری درجہ حرارت ہے اور یہ دیکھ کر آپ سوچ میں پڑ جائیں گے کے منفی 47 ڈگری کے درجہ حرارت میں حرارت کہاں ہے۔

اس آرٹیکل میں کے ٹو بیس کیمپ نہیں شامل کیا جا رہا بلکہ پاکستان کے اُن شہروں کو شامل کیا جا رہا ہے جہاں درجہ حرارت کبھی بھی 0 ڈگری یا اُس سے نیچے ریکارڈ کیا گیا، تو آئیے کراچی سے شروع کرتے ہیں۔

کراچی پاکستان کا سب سے بڑا شہر ہے اور کبھی پاکستان کا دارلحکومت ہوتا تھا، اس شہر کا عام طور موسم سرما سے زیادہ واسطہ نہیں پڑتا اور یہاں کا موسم گرم مرطوب ہی رہتا ہے لیکن 21 جنوری 1934 میں کراچی والوں نے ایک ایسا دن دیکھا جب کراچی کا درجہ حرارت 0 ڈگری ہو گیا۔

لاڑکانہ کا شُمار پاکستان کے گرم ترین علاقوں میں ہوتا ہے جہاں 31 مئی 1998 کو درجہ حرارت 52.2 ڈگری ریکارڈ کیا گیا تھا لیکن لاڑکانہ میں 6 جنوری 2006 میں لوگوں نے ایک ایسا دن دیکھا جب اتنی سردی پڑی کے درجہ حرارت منفی 1 ڈگری ہو گیا۔

زیارت پاکستان کا ایک انتہائی خوبصورت مُقام ہے جہاں قائد اعظم نے اپنے آخری آیام بسر کیے، کہتے ہیں اس شہر نے کبھی گرمی نہیں دیکھی لیکن جو سردی اس شہر نے دیکھی وہ پاکستان کے کسی اور شہر نے کبھی نہیں دیکھی کیونکہ 11 فروری 2009 کے دن اس شہر کا درجہ حرارت منفی 50 ڈگری کو چھُو گیا اور یہ پاکستان کہ کسی بھی شہر کا اب تک کا ریکارڈ کیا گیا سب سے کم درجہ حرارت ہے۔

لاہور پاکستان کا دُوسرا بڑا شہر ہے جہاں عام طور پر کبھی درجہ حرارت 0 ڈگری تک نہیں پہنچا لیکن 17 جنوری 1935 کے دن اس شہر کا درجہ حرارت منفی 2.2 ڈگری تک چلا گیا اور یہ لاہور کا اب تک کا سب سے کم درجہ حرارت ہے جو ریکارڈ کیا گیا۔

فیصل آباد پاکستان کا تیسرا بڑا شہر ہے اور یہ شہرصحرائے تھل سے زیادہ دُور نہیں ہے اور صرف 100 کلومیٹر کی دُوری پر ہے اور صحرائے تھل کا شُمار دُنیا کے گرم ترین صحراؤں میں ہوتا ہے جسکی وجہ سے فیصل آباد میں موسم گرما میں شدید گرم ہوجاتا ہے لیکن 11 دسمبر 1996 کے دن فیصل آباد میں درجہ حرارت منفی 1 ڈگری ریکارڈ کیا گیا جو اس شہر کا آج تک سب سے کم درجہ حرارت ہے۔

اسلام آباد اور راولپنڈی جڑواں شہر ہیں اور مارگلہ کی پہاڑیوں کے قریب ہونے کی وجہ سے یہاں موسم سردیوں میں کافی سرد ہو جاتا ہے لیکن 17 جنوری 1967 کو راولپنڈی میں تاریخ کی سب سے زیادہ سردی ریکارڈ کی گئی اور اس شہر کا درجہ حرارت منفی 3.9 ڈگری ریکارڈ کیا گیا اور اسی دن اسلام آباد میں منفی 6 ڈگری سردی پڑی اور یہ ان دونوں شہروں کی سب سے شدید سردی ہے جو اب تک ریکارڈ کی گئی۔

پشاور صوبہ خیبر پختون خواہ کا دارلخلافہ ہے اور سردیوں میں اکثر یہاں درجہ حرارت 0 ڈگری کے قریب چلا جاتا ہے مگر 7 جنوری 1970 کے دن پشاور میں آج تک کی سب سے زیادہ سردی ریکارڈ کی گئی اور درجہ حرارت منفی 3.9 ڈگری تک چلا گیا۔

موہنجوداڑو صوبہ سندھ کا ایک تاریخی شہر ہے جو اپنی شدید گرمی کی وجہ سے مشہور ہے اور اسے پاکستان کا سب سے گرم علاقہ ہونے کا اعزاز حاصل ہے کیونکہ یہاں 26 مئی 2010 کو پاکستان کی تاریخ کا سب سے گرم ترین درجہ حرارت ریکارڈ ہُوا اور گرمی 53.5 ڈگری تک چلی گئی لیکن 6 جنوری 2006 میں اس شہر میں موسم اتنا سرد ہُوا کے درجہ حرارت منفی 5.4 ڈگری کو چھُو گیا اور یہ اس شہر کی تاریخ کا سب سے سرد ترین دن تھا جسے ریکارڈ کیا گیا۔

سکردو گلگت بلتستان کا ایک انتہائی خوبصورت شہر ہے جہاں شدید سردی پڑتی ہے مگر اس سال یعنی 24 جنوری 2019 کو اس شہر میں شدید ترین موسم ریکارڈ ہُوا اور درجہ حرارت منفی 22 ڈگری تک چلا گیا۔

قلات بلوچستان کا ایک خوبصورت شہر ہے جہاں سردیوں میں شدید سردی پڑتی ہے مگر 30 دسمبر 2013 کے دن اس شہر کا درجہ حرارت منفی 15 ڈگری تک چلا گیا۔

کوئٹہ صوبہ بلوچستان کا دارلخلافہ ہے جہاں عام طور پر سردیوں میں درجہ حرارت منفی میں چلا جاتا ہے مگر 18 جنوری 1970 میں اس شہر نے اپنی تاریخ کی سب سے شدید ترین سردی دیکھی اور یہاں درجہ حرارت منفی 18.3 ڈگری کو چُھو گیا۔

Featured Image Preview Credit: Shahid1024 [CC BY-SA 4.0], via Wikimedia Commons, Image has been cropped
And Ammar Ejaz [CC BY-SA 3.0], via Wikimedia Commons, The image has been cropped