دال چنا میں پروٹین کی ایک بڑی مقدار شامل ہے اور یہ دال ہماری صحت کے لیے انتہائی مُفید ہے مگر اس دال کے متعلق عام طور پر ایک تاثر پایا جاتا ہے کہ یہ معدے میں درد اور گیس کا باعث بنتی ہے چنانچہ اسے بہت سے لوگ نہیں کھاتے اور اس کے بیشمار فائدوں سے محروم رہتے ہیں۔

اس آرٹیکل میں ہم چنے کی دال کے صحت کے لیے مُفید فائدوں کا ذکرکریں گے اور چنے کی دال کو پکانے کا وہ طریقہ جانیں گے جس سے یہ معدے پر بھاری نہیں ہوتی اور گیس کا باعث نہیں بنتی۔

انرجی فُل کر دیتی ہے

چنے کی دال میں پروٹین کے ساتھ انسانی صحت کے لیے بہت سے اہم وٹامنز اور منرلز خاص طور پر زنک اور کیلشیم شامل ہوتے ہیں جو جسم کی بہت سی ضرورتوں کو پُورا کرنے کیساتھ جسم میں توانائی کو بُوسٹ کرنے کا باعث بنتے ہیں۔

خُون کی کمی کو پُورا کرتی ہے

چنے کی دال میں آئرن کی بھی ایک بڑی مقدار شامل ہوتی ہے جو خون میں شامل سُرخ خُلیوں کی مقدار کو نارمل رکھنے اور جسم کو آکسیجن پہنچانے میں اہم کردار ادا کرتا ہے۔

معدے کے مسائل کو حل کرتی ہے

دال چنے میں شامل فائبر کی ایک بڑی مقدار معدے کے بہت سے مسائل کو حل کرکے پیٹ کی صفائی کردیتی ہے اور معدے کی بہت سی بیماریوں کو پیدا ہونے سے پہلے ہی قابو کر لیتی ہے۔

شُوگر کو قابو کرتی ہے

اس دال کی ایک خُوبی یہ ہے کہ یہ خوراک سے گُلوکوز کو اپنے اندر جذب کرنے کی صلاحیت رکھتی ہے جس سے کھانے کے بعد خون میں شوگر کا لیول تیزی سے اوپر نہیں جاتا اور اس دال میں شامل میگنیشیم جسم میں انسولین کے رسپونس کو بہتر بناتا ہے، اس خُوبی کی وجہ سے یہ دال شُوگر کے مریضوں کے لیے انتہائی مُفید غذا ہے۔

کولیسٹرال کم کرتی ہے

دال چنا میں فائبر کی بڑی مقدار نہ صرف معدے کے مسائل کا حل ہے بلکہ یہ ہائی کولیسٹرال کو کم کرنے میں بھی انتہائی مُفید مانی جاتی ہے اور ساتھ ہی ساتھ فائبر جسم کا بڑھا ہُوا وزن کم کرنے میں بھی مددگار ثابت ہوتی ہے۔

بلڈ پریشر کم کرتی ہے

چنے کی دال میں پوٹاشیم کی مقدار زیادہ اور سوڈیم کی مقدار کم ہوتی ہے اور ایسے کھانے جن میں پوٹاشیم زیادہ ہو اور سوڈیم کم وہ بڑھے ہُوئے بلڈ پریشر کو کم کرنے کی صلاحیت رکھتے ہیں اور دل کے لیے بھی انتہائی مُفید مانے جاتے ہیں۔

جلد کے لیے مفید ہے

زنک ہماری قوت مدافعت کو مضبوط بناتا ہے اور چنے کی دال میں زنک اور اینٹی آکسائیڈینٹس کی موجودگی ایمیون سسٹم کو طاقت دیتی ہے جس سے ہماری جلد خوبصورت اور تروتازہ رہتی ہے۔

آنکھوں کی تقویت دیتی ہے

زنک قوت مدافعت کیساتھ ساتھ آنکھوں کی صحت کے لیے بھی مُفید مانا جاتا ہے کیونکہ یہ نائٹ بلائینڈنس کی بیماری کو ٹھیک کرنے میں اہم کردار ادا کرتا ہے۔

دانت اور ہڈیوں کو مضبوط بناتی ہے

چنے کی دال میں موجود کیلشیم ہماری ہڈیوں کی اور دانتوں کی نشوونما کے لیے بُنیادی منرل ہے جو ہڈیوں اور دانتوں کو مضبوط بناتا ہے۔

پی ایچ لیول نارمل کرتی ہے

چنے کی دال میں فاسفورس کی مقدار جسم میں تیزابی مادوں کو نیوٹرل کرنے میں اہم مانا جاتا ہے جو ماسد مادوں کو نیوٹرل کر کے جسم کے پی ایچ لیول کو نارمل کرتا ہے۔

حاملہ خواتین کے لیے بہترین

ماہرین کا کہنا ہے کہ فولک ایسڈ حاملہ خواتین اور اُن کے بچوں کی پیٹ میں اچھی نشوونما کے لیے انتہائی اہم چیز ہے اور چنے کی دال میں فولک ایسڈ کی موجودگی اسے حاملہ خواتین کے لیے سُپر کھانا بنا دیتی ہے۔

 چنے کی دال پکانے کا طریقہ جس سے یہ پیٹ میں گیس نہیں کرتی

زیادہ مقدار میں فائبر کھانے سے پیٹ میں گیس، پیٹ کا پھولنا اور قبض جیسی بیماریوں کا باعث بن سکتا ہے اس لیے دال پکانے سے ایک رات پہلے اسے پانی میں بگھو دیں اس سے دال میں موجود ایسے اجزا جو معدے کو ہضم کرنے میں وقت لگتا ہے اور جو گیس کا باعث بنتے ہیں نرم ہو کر زُد ہضم ہوجائیں گے۔

اگر آپ چنے کی دال کو اپنی روزانہ کی خوراک میں شامل کرنا چاہتے ہیں تو اس کی ابتدا میں اس کی کم مقدار استعمال کریں اور آہستہ آہستہ مقدار کو بڑھائیں تاکہ جسم میں فائبر کو ہضم کرنے کی صلاحیت بڑھے۔