اکثر لوگ جانتے ہُوئے یا لاعلمی میں کھانے کے بعد ایسی چیزیں استعمال کر لیتے ہیں جو اُن کے جسم کو فائدہ دینے کی بجائے نقصان پہنچاتی ہیں اور جب ان چیزوں کا استعمال انسان کی عادت بن جائے تو اس سے دائمی بیماریاں پیدا ہوتی ہیں جو صحت کو برباد کر کے رکھ دیتی ہیں۔

اس آرٹیکل میں چند ایسے کھانے اور کام شامل کیے جا رہے ہیں جو کھانے کے بعد ہرگز نہیں کرنے چاہیے اس لیے انہیں اچھی طرح ذہن نشین کر لیجیے گا اور اپنے بچوں کو بھی ان چیزوں سے پرہیز کی تربیت دیجیے گا تاکہ صحت اور جوانی مستقل قائم رہے۔

نمبر 1 چائے اور کافی

کھانے کے فوراً بعد چائے اور کافی کا استعمال شدید نقصان دہ ہے کیونکہ یہ دونوں ہاضمے کو خراب کرتی ہیں، ماہرین کا کہنا ہے کہ کھانے سے ایک گھنٹہ پہلے اور ایک گھنٹہ بعد تک چائے اور کافی کا استعمال نہیں کرنا چاہیے کیونکہ ان دونوں میں موجود کیمیائی عناصر جسم کے آئرن جذب کرنے کے عمل کو روکتے ہیں اور انہیں 87 فیصد تک سُست کر دیتے ہیں جس سے ہاضمے کے مسائل پیدا ہونے کے ساتھ آئرن کی کمی پیدا ہو سکتی ہے جو خون کی کمی کا باعث بنتی ہے۔

نمبر 2 کھانے کے فوراً بعد پھل کھانا

ماہرین کے مطابق پھل ناشتے میں اور خالی پیٹ کھانا سب سے زیادہ مفید ثابت ہوتا ہے اور اگر ان کا استعمال دوپہر اور رات کے کھانے کے بعد کیا جائے تو یہ ٹھیک طریقے سے ہضم نہیں ہو پاتے اور جسم ان میں شامل غذائی اجزا کو جذب کرنے سے قاصر رہتا ہے اس لیے کھانے کے فوراً بعد پھلوں کا استعمال نہ کریں۔

نمبر 3 ٹھنڈا پانی

اگرچہ پانی کھانے کو ہضم کرنے کے لیے ضروری ہے لیکن کھانے کے فوراً بعد پانی پینا صحت کے لیے نقصان دہ ہے اور ٹھنڈا پانی تو بلکل بھی نہیں پینا چاہیے۔ ماہرین کا کہنا ہے کہ کھانے کے بعد پانی پینا نظام ہضم کو بری طرح متاثر کرتا ہے اور موٹاپے کا باعث بنتا ہے اس لیے کھانے سے 45 منٹ تک پانی نہیں پینا چاہیے اور اس وقفے کے بعد بھی نیم گرم پانی کا استعمال صحت کے لیے زیادہ مفید ہے۔

نمبر 4 تمباکو نوشی سے پرہیز

تمباکو نوشی صحت کے لیے نقصان دہ ہے لیکن اس کے نقصانات میں اُس وقت کئی گُنا اضافہ ہو جاتا ہے جب لوگ کھانے کے فوراً بعد اسے استعمال کرتے ہیں کیونکہ کھانا کھانے کے فوراً بعد تمباکو کا استعمال آنتوں کی بیماریوں کا باعث بنتا ہے اور اس سے چڑچڑا پن بھی پیدا ہوتا۔

ماہرین کا کہنا ہے کہ کھانے کے فوراً بعد ایک سیگرٹ پینا ٍ10 سیگرٹوں جتنا نقصان پہنچاتا ہے اس لیے اگر آپ تمباکو نوشی کے عادی ہیں اور اسے چھوڑنا نہیں چاہتے تو کم از کم کھانے کے فوراً بعد اسکا استعمال چھوڑ دیں۔

نمبر 5 الکوحل

تمباکو نوشی کی طرح الکوحل بھی صحت کو شدید نقصان پہنچاتی ہے اور کھانے کے بعد اسکا استعمال نظام ہضم کو بُری طرح متاثر کرنے کا باعث بنتا ہے اور جسم کے ساتھ آنتوں کو بھی نقصان پہنچاتا ہے اس لیے اس نہ تو کھانے سے پہلے استعمال کریں اور بعد میں تو ہرگز ہاتھ نہ لگائیں۔

نمبر 6 کھانے کے بعد نہانا

طب ایوردیک اور یونان کے ساتھ اب جدید میڈیکل سائنس بھی کھانے کے بعد نہانے سے منع کرتی ہے کیونکہ اس سے جسم کا درجہ حرارت اچانک کم ہو جاتا ہے جس سے دوران خون متاثر ہوتا ہے۔ خوراک ہضم ہونے کے لیے خون کی گردش کی بھی ضرورت ہوتی ہے اور اگر یہ گردش متاثر ہو تب بھی ہاضمہ ٹھیک کام نہیں کر پاتا۔

نمبر 7 کھانے کے فوراً بعد سونا

ماہرین کا کہنا ہے کہ رات کے کھانے کے فوراً بعد سونا موٹاپے کیساتھ ساتھ کئی اور بیماریوں کا باعث بن سکتا ہے جن میں بد ہضمی، سینے میں جلن، تیزابیت اور نیند کے دوران بلند آواز میں خراٹے لینے کی بیماری شامل ہے۔ ماہرین کا کہنا ہے کہ رات کے کھانے کے 2 گھنٹے تک بستر پر نہیں جانا چاہیے اور رات کے کھانے کے فوراً بعد پیدل چلنا چاہیے تاکہ کھانے کو ہضم ہونے میں آسانی ہو۔