کھیرے کا پانی عام طور پر چائنیز بیوٹی پارلرز اوربیوٹی سیلونز میں پلایا جاتا ہے تاکہ اس کو پینے سے جلد پُوری طرح طروتازہ ہوجائے لیکن کھیرے کا پانی پینا صرف جلد کو ہی تروتازہ نہیں کرتا بلکہ یہ ہمارے پُورے جسم کو کئی طریقوں سے فائدہ پہنچاتا ہے اور اس آرٹیکل میں ہم پانی میں کھیرا بگھو کر پانی پینے کے چند ایسے فائدے ذکر کریں گے جنہیں پڑھ کر آپ کو اس بہترین ڈرنک کی افادیت سے آگاہی ہو گی اور آپ بھی اس بنانے میں آسان ڈرنک کو اپنی خوراک میں شامل کرنا چاہیں گے۔

نمبر 1 جسم میں پانی کی کمی پیدا نہیں ہونے دیتا

ہم سب جانتے ہیں کہ پانی پینا زندہ رہنے کے لیے بہت ضروری ہے اور عام طور پر غذائی ماہرین کا کہنا ہے کہ ہر آدمی کو روزانہ کم از کم 6 سے 8 گلاس پانی لازمی پینا چاہیے تاکہ جسم میں پانی کی کمی پیدا نہ ہو۔

پینے والے پانی میں اگر کھیرے کو کاٹ کر ڈال دیا جائے تو اُس پانی میں کھیرے کے وٹامنز اور منزلز شامل ہوتے ہیں جو پیاس کی شدت کو کم کرنے کیساتھ ساتھ ہماری صحت پر بہت اچھے اثرات مرتب کرتے ہیں اور جسم میں پانی کی کمی کو پیدا ہونے سے روکتے ہیں۔

نمبر 2 وزن کم کرنے میں مددگار ہے

اگر آپ وزن کم کرنا چاہتے ہیں تو اپنی روزانہ کی خوراک سے سوڈا، سپورٹس ڈرنکس، انرجی بُوسٹر اور دیگر چینی والے ڈرنکس نکال کر قُدرتی کھیرے والا پانی شامل کریں یہ آپ کو دُوسرے مشروبات کی طرح فضول کیلوریز نہیں دے گا اور آپ کے معدے کو بھرا رکھے گا جس سے آپ بلاوجہ کی بھوک کےمسائل سے بچیں گے۔

بھوک محسوس ہونے پر پہلے ایک گلاس کھیرے والا پانی پی لیں اگر آپ کی بھوک ختم ہو جائے تو سمجھ جائیں کہ آپ کو بھوک نہیں پیاس لگی تھی اور یاد رکھیں کے پیاس لگنے سے بھی بھوک محسوس ہو سکتی ہے اور اگر پانی پینے کے بعد آپ کی بھوک برقرار رہے تو سمجھ جائیں کہ جسم کو کھانے کی ضرورت ہے۔

نمبر 3 یہ اینٹی آکسائیڈینٹ ہے

کھیرے میں قُدرتی اینٹی آکسائیڈینٹس شامل ہوتے ہیں جو ہمارے جسم کو بہت سی دائیمی بیماریوں سے محفوظ رکھتے ہیں خاص طور پر اندرونی اعضا کو کینسر سے، دل کی بیماریوں سے، شوگر، بھولنے کی بیماری اور آنکھوں کو کمزور ہونے سے بچاتے ہیں۔

کھیرے میں موجود وٹامن سی، بیٹا کورنیٹ، میگنیز اور کئی اینٹی آکسائیڈینٹ کھیرے سے پانی میں شامل ہو جاتے ہیں اور پھر ان وٹامنز اور منرلز سے بھر پُور پانی ہمیں سادہ پانی سے کہیں زیادہ فائدہ دیتا ہے۔

نمبر 4 یہ بلڈ پریشر کم کرتا ہے

ہمارے جسم میں بلڈ پریشر بڑھنے کی ایک بڑی وجہ نمک ہے اور زیادہ سوڈیم والے کھانے ہیں، نمک کی زیادتی جسم میں پانی کے بہاؤ کو روکتی ہے جس کے باعث بلڈ پریشر میں اضافہ ہوتا ہے۔

پوٹاشیم ایک ایلکٹرولائٹ ہے جو جسم میں بڑھے ہُوئے نمک کی مقدار کو کنٹرول کرنے میں مدد کرتا ہے اور کھیرے میں پوٹاشیم شامل ہوتا ہے اور کھیرے والے پانی کو پینے سے جسم میں پوٹاشیم کی مقدار بڑھتی ہے جو جہاں بلڈپریشر کنٹرول کرنے میں مددگار ثابت ہوتی ہے وہاں اور کئی بیماریوں جیسے دل اور ذیابطیس کی بیماری میں مفید ہے۔

نمبر 5 یہ جلد کو تروتازہ بناتا ہے

کھیرے کا پانی جلد کو اندر اور باہر سے تروتازہ کر دیتا ہے یہ جسم سے فاضل مادوں کو خارج کرنے میں مدد کرتا ہے اور ان فاضل مادوں کے خارج ہونے سے ہماری جلد تروتازہ اور توانا دیکھائی دینی شروع کر دیتی ہے۔

نمبر 6 ہڈیوں کو مضبوط بناتا ہے

کھیرے میں وٹامن کے کی ایک بڑی مقدار شامل ہوتی ہے اور صرف ایک کپ کٹے ہُوئے کھیرے میں ہمارے جسم کی روزانہ کی مطلوبہ مقدار کا 19 فیصد وٹامن کے شامل ہوتا ہے اور وٹامن کے ہماری
ہڈیوں اور پٹھوں کو مضبوط بنانے میں اہم کردار ادا کرتا ہے۔

نمبر 7 کینسر ختم کر سکتا ہے

ایک تحقیق کے مُطابق کھیرے میں اینٹی آکسائیڈینٹ خوبیوں کے ساتھ ساتھ ایسے کمپاونڈزشامل ہوتے ہیں جو کینسر کے خلاف لڑنے میں جسم کی مدد کرتے ہیں۔

نمبر 8 پانی کے ذائقے کو بہتر بنا دیتا ہے

پانی میں کھیرا مکس کرنے سے پانی کا ذائقہ بہتر ہوتا ہے اور پانی پینے کو جی چاہنا شروع ہو جاتا ہے یہ پانی میں اپنی خاص مہک بھی شامل کرتا ہے جو دماغ کو تروتازہ کردیتی ہے اور مُوڈ کو بہتر بنانے کی صلاحیت رکھتی ہے۔

کھیرے کے پانی بنانے کا طریقہ

کھیرا کاٹ کر پانی میں بگھو دیں اور اگر پانی کے ذائقے کو مزید دوبالا کرنا چاہتے ہیں تو ساتھ میں پودینا بھی شامل کر دیں اور پھر اس پانی میں برف ڈال کر فرج میں رکھ دیں اور ایک گھنٹے کے بعد استعمال کرنا شروع کر دیں۔