سمجھدار والدین ہمیشہ اپنے بچوں کو بتاتے ہیں "اگر اندھیرے میں دیکھنا چاہتے ہو تو گاجر کھایا کرو” ، یہ بات کتنی سچ ہے اور گاجر کیا صرف بینائی کو بہتر بناتی ہے یا اس کے اور بھی فائدے ہیں، اس آرٹیکل میں ہم جانیں گے کے گاجر کوئی عام سبزی نہیں ہے بلکہ خالق نے اس کے اندر بیشمار خُوبیاں رکھی ہیں۔

ماہرین کا کہنا ہے کہ ہزاروں سالوں پہلے گاجر کو موجودہ افغانستان میں اُگایا جاتا تھا مگر اُس وقت یہ سائز میں چھوٹی رنگ میں پیلی اور جامنی اور ذائقے میں انتہائی کڑوی اور لکڑی جیسی ہوتی تھی اور جس گاجر کو آج ہم جانتے ہیں اس سے بلکل مختلف ہوتی تھی پھر سولہویں صدی میں ڈچ کسانوں نے میٹھی گاجریں اُگانے کا فن سیکھا اور آج دُنیا میں مختلف رنگوں کی میٹھی گاجریں اُگائی جارہی ہیں جو ہماری صحت پر انتہائی اچھے اثرات مرتب کرتی ہیں۔

گاجر بیشمار وٹامنز، منرلز، اور غذائی فائبر کیساتھ ساتھ اینٹی آکسائیڈینٹ خوبیوں کی حامل ہے اور اینٹی آکسائیڈینٹ خوبیاں ہمارے جسم کے سیلز کو خراب ہونے سے بچاتی ہیں۔

گاجر ہمیں کیسے فائدہ پہنچاتی ہے آئیے جانتے ہیں۔

نمبر 1 بینائی کو طاقتور بناتی ہے

کیا گاجر ہماری آنکھوں کو اندھیرے میں دیکھنے کے قابل بناتی ہے؟ جی ہاں بلکل کیونکہ گاجر میں وٹامن اے شامل ہوتا ہے اور جسم میں وٹامن اے کی کمی بینائی کو متاثر کرتی ہےاور اگر یہ کمی زیادہ ہوجائے تو رات کو دیکھائی دینا مُشکل اور بعض اوقات بند ہو جاتا ہے جسے نائٹ بلائینڈنس کہتے ہیں۔

گاجر کا شُمار اُن سبزیوں میں ہوتا ہے جن میں بیٹا کیروٹین کی بڑی مقدار شامل ہوتی ہے اور یہ کیمیا ہماری آنکھوں کو توانا رکھنے میں انتہائی اہم کردار ادا کرتا ہے خاص طور پر یہ آنکھوں کو سُورج کی تیز روشنی جذب کرنے صلاحیت عطا کرتا ہے اور تیز روشنی کے اثرات سے آنکھوں کو محفوظ رکھتا ہے۔

نمبر 2 یہ شوگر کے مریضوں کے لیے مُفید ہے

گاجر میٹھی ہوتی ہے مگر اس میں موجود فائبر اور کاربوہائیڈریٹس اس کی شوگر کو خون میں تیزی سے شامل نہیں ہونے دیتے اور یہی وجہ ہے کے گاجر کا شُمار اُن سبزیوں میں ہوتا ہے جن کا گلیسمک انڈیکس کم ہے یعنی یہ خُون میں شوگر لیول کو تیزی سے نہیں بڑھاتی اور ایک میڈیم سائز کی گاجر میں صرف 25 کیلوریز ہوتی ہیں چنانچہ یہ ٹائپ 2 کی ذیابطیس کے مریضوں کے لیے بہترین سبزی ہے۔

نمبر 3 بلڈ پریشر اور دل کے مریضوں کے لیے اکسیر ہے

گاجر میں پوٹاشیم اور فائبر شامل ہوتی ہے جو بڑھے ہُوئے بلڈ پریشر کے لیے انتہائی مفید کیمیا ہیں اور ماہرین کے مُطابق دل کی بیماریوں میں مُبتلا افراد کے لیے کم سوڈیم والے کھانے اور زیادہ پوٹاشیم والے کھانے انتہائی مُفید ثابت ہوتے ہیں کیونکہ پوٹاشیم دل میں خون لیجانے والی رگوں کو آرام پہنچاتی ہے۔

ایک اور تحقیق کے مُطابق زیادہ ڈائٹری فائبر کھانے والے افراد میں دل کی بیماریاں لاحق ہونے کا خدشہ فائبر نہ کھانے والے افراد سے کم ہوتا ہے اور ڈائٹری فائبر خون سے بُرے کولیسٹرال کا خاتمہ بھی کرتی ہے۔

ماہرین کا کہنا ہے کہ ہر آدمی کو اپنی روزانہ کی خوراک میں کم از کم 25 گرام فائبر ضرور کھانی چاہیے اور ایک درمیانے سائز کی گاجر میں تقریباً 1.7 گرام فائبر ہوتی ہے۔

نمبر 4 گاجر قوت مدافعت کو مضبوط بناتی ہے

گاجر میں اینٹی آکسائیڈینٹ خوبیاں ہوتی ہیں خاص طور پر یہ اینٹی آکسائیڈینٹ وٹامن سی سے بھرپور غذا ہے اور وٹامن سی جہاں ہمارے جسم کو اور بہت سے مہلک بیماریوں سے بچاتا ہے وہاں یہ ہماری قوت مدافعت کو طاقتور بناتا ہے اور ہمارے جسم میں بیماریوں سے لڑنے کی قوت پیدا کرتا ہے۔

ماہرین کا کہنا ہے کہ گاجر کا وٹامن سی کلوجن (ایک قسم کی پروٹین) کی پیداوار بڑھاتا ہے جو ہماری جلد کے لیے انتہائی اہم اور مفید ہے خاص طور پر یہ زخموں کو جلد بھر دیتا ہے اور ہمارے جسم کو صحت مند رکھتا ہے۔

بعض ماہرین کا کہنا ہے کہ وٹامن سی کے سپلیمنٹ استعمال کرنا بھی ہمارے جسم کی قوت مدافعت کو مضبوط بناتا ہے اور یہ ہمیں سردی میں جب ایمیون سسٹم یعنی قوت مدافعت کمزور ہوتی ہے تو اُسے طاقتور کرنے باعث بنتا ہے۔

نمبر 5 ہڈیوں کو مضبوط کرتی ہے

گاجر میں جہاں وٹامن "کے” شامل ہوتا ہے وہاں محدود مقدار میں کیلشیم اور فاسفورس جیسے منرلز بھی شامل ہوتے ہیں اور یہ تمام ہڈیوں کو مضبوط اور صحت مند رکھنے میں انتہائی اہم کردار ادا کرتے ہیں۔

نمبر 6 نظام انہظام کے لیے مُفید ہے

ہم سب جانتے ہیں کہ فائبر نظام انہظام کو بہتر بنانے میں اپنا ثانی نہیں رکھتا اور گاجر فائبر سے بھرپوُر ہوتی ہے جس کا فائبر خوراک کو ہضم کرنے اور فُضلے کو خارج کرنے میں انتہائی اہم کردار ادا کرتا ہے اور ایسے کھانے جن میں فائبر کی مقدار زیادہ ہو ہمارے آنتوں کے لیے انتہائی مُفید ہیں اور یہ ہمیں کولن کینسر یعنی آنتوں کے سرطان سے محفوظ رکھتے ہیں۔

نمبر 7 گاجر ہمیں کینسر سے بچاتی ہے

ڈاکٹرز کا کہنا ہے کہ جسم میں فری ریڈیکلز ہوتے ہیں اور اگر ان کی مقدار بڑھ جائے تو یہ ہمارے جسم کے اعضا کو نقصان پہنچاتے ہیں اور مختلف طرح کی کینسر کا باعث بنتے ہیں اور گاجر کی اینٹی آکسائیڈینٹ خوبیاں فری ریڈیکلز کی بڑھی ہُوئی تعداد کو قابو میں کرنے کی صلاحیت رکھتی ہے اور ہمیں بہت سے کینسرز سے بچاتی ہے جن میں پروسٹیٹ کا کینسر، لکویمیا، پھیپھڑوں کا کینسر وغیرہ سر فہرست ہیں۔

نمبر 8 گاجر وزن کم کرتی ہے

موٹاپے جیسی بیماریوں میں مُبتلا افراد جو اپنا وزن کم کرنا چاہتے ہیں اُن کے لیے گاجر ایک زبردست سبزی ہے جو جہاں بھوک کو مٹاتی ہے اور معدے کو بھرا رکھتی ہے وہاں انتہائی کم کیلوریز ہونے کے باعث وزن کو بڑھنے نہیں دیتی۔

گاجر کیسے کھانی چاہیے

گاجر ایک ایسی سبزی ہے جسے آپ پکائے بغیر کھا سکتے ہیں آپ اسے باریک کاٹ کر سلاد میں شامل کر سکتے ہیں اور اسے چھیل کر ویسے بھی کھا سکتے ہیں اور اس کا جُوس بنا کر بھی پی سکتے ہیں، ماہرین کا کہنا ہے کہ گاجر کو پکانے سے یا اُبالنے سے اس کے وٹامنز کم ہو جاتے ہیں اسی لیے مغربی معاشرے میں لوگ زیادہ تر گاجر کو کچا ہی کھاتے ہیں۔