فیشل سٹیم جلد کے لیے ایک ایسا بہترین ٹوٹکا ہے جس پر عام طور پر کوئی پیسا خرچ نہیں ہوتا اور آپ جب چاہیں سہولت کے ساتھ گھر میں اپنے چہرے کی جلد کو بھاپ کیساتھ کلینز کر سکتے ہیں۔
اس آرٹیکل میں ہم چہرے کو ہفتے میں ایک دفعہ بھاپ دینے کے 10 ایسے فائدوں کا ذکر کریں گے جنہیں پڑھ کر جہاں آپ کی معلومات میں اضافہ ہوگا وہاں آپ بھی اپنے چہرے کی جلد کو نرم و ملائم اور خوبصورت بنانے کے لیے اس آسان ٹوٹکے کا استعمال کرنا چاہیں گے۔

نمبر 1 بھاپ چہرے کی بہترین صفائی کرتی ہے

بھاپ چہرے کے مسام کھول دیتی ہے اور ان مساموں میں پھنسی میل کو خود بخود باہر نکال دیتی ہے اور مساموں کے کُھلنے سے چہرے کی جلد پر بنے بلیک ہیڈ نرم ہو جاتے ہیں اور اُنہیں ختم کرنے میں آسانی ہوتی ہے یعنی بھاپ چہرے کی جلد کی گہرائی تک صفائی کرتی ہے اور جلد میں چمک بیدار کرتی ہے۔

نمبر 2 جلد میں خون کی روانی بہتر ہوتی ہے

گرم بھاپ سے چہرے پر پسینہ آنا شروع ہوتا ہے اور بھاپ اور پسینے سے چہرے کی جلد کے نیچے موجود خون کی نالیاں پھیلتی ہیں اور اس سے چہرے کی جلد کی طرف خون کا بہاؤ تیز ہوتا ہے، خون کا یہ تیز بہاؤ جہاں چہرے کی جلد کو قوت دیتا ہے وہاں خون کے ذریعے آکسیجن کی ترسیل بڑھ جاتی ہے اور چہرہ کھلنا شروع ہو جاتا ہے۔

نمبر 3 بیکٹریا کو ختم کرتی ہے

بھاپ سے چہرے کے مسام جب کُھل کر صاف ہوتے ہیں تو ان مساموں میں پرورش پانے والا بیکٹریا بھی صاف ہو جاتا ہے اور یہ بیکٹریا چہرے پر ایکنی اور کیل مہاسے پیدا کرنے کا سب سے بڑا سبب ہے یعنی بھاپ کیل مہاسوں اور ایکنی وغیرہ کو ختم کرنے میں مدد کرتی ہے۔

نمبر 4 چہرے کا قُدرتی آئل بحال ہوتا ہے

ہمارے جلد کے نیچے موجود قُدرتی آئل پیدا کرنے والے گلائینڈز دُھول اور چہرے کی میل کی وجہ سے جلد کے نیچے دب جاتے ہیں اورجلد کے نیچے بیکٹریا ان کی نمی میں پرورش پانا شروع کر دیتا ہے اور بھاپ جلد کی صفائی کرتی ہے تو یہ گلائینڈز کُھل کر کام کرتے ہیں اور آئل کو جلد کے اوپر تک پہنچا پاتے ہیں جس سے چہرے کی جلد میں خشکی ختم ہوتی ہے اور بیکٹریا بھی اپنی افزائش نہیں کر پاتا اور چہرہ تروتازہ لگتا ہے۔

نمبر 5 سٹیم چہرے کی جلد کو ہائیڈریٹ کرتی ہے

بھاپ چہرے کی جلد کو ہائیڈریٹ کرنے میں انتہائی مددگار چیز ہے کیونکہ یہ جلد میں آئل کی پروڈکشن کو بڑھاتی ہے اور جلد اگر ڈی ہائیڈریٹ ہو تو جہاں جلد پر جھریاں پڑنی شروع ہو جاتی ہیں وہاں کمزور جلد کئی اور مسائل کو جنم دیتی ہے۔

نمبر 6 چہرے کی جذب کرنے کی صلاحیت بڑھتی ہے

بھاپ چہرے کی جذب کرنے کی صلاحیت میں اضافہ کرتی ہے یعنی اگر آپ بھاپ کے بعد چہرے پر ایسے لوشن جن میں وٹامنز وغیرہ شامل ہوں یا گری کا تیل وغیرہ ملتے ہیں تو یہ جلد میں اچھی طرح جذب ہوکر زیادہ فائدہ دیتے ہیں۔

نمبر 7 یہ کلوجن اور ایلاسٹن کو بڑھاتی ہے

کلوجن جلد کے نیچے ایک قسم کی پروٹین ہے جو خون کی روانی سے اپنی مقدار کو بڑھاتی ہے اور ساتھ ہی ساتھ ایلاسٹن کی مقدار بھی بڑھتی ہے ان دونوں کی مقدار بڑھنے سے جلد جوان، چمکدار اور توانا ہونا شروع کر دیتی ہے اور چہرے پربڑھاپے کے اثرات کم ہوجاتے ہیں۔

نمبر 8 جلد کو آرام پہنچاتی ہے

چہرے پر گرم بھاپ کو محسوس کرنا جلد کو ریلیکس کرتا ہے اور جلد کومزید ریلیکس کرنے کے لیے آپ اپنی بھاپ میں ایزینشیل آئل وغیرہ شامل کر سکتے ہیں۔

نمبر 9 ساینس کی بیماریوں کے لیے مُفید ہے

ساینس ناک اور آنکھوں کے اوپر ہوا کی پاکٹس کو بلاک کرتا ہے جس سے نزلہ، زکام سر درد وغیرہ پیدا ہوتاہے، سٹیم ان بند پاکٹس کو کھول دیتی ہے اور سانس لینے میں آسانی پیدا ہو جاتی ہے۔

نمبر 10 انتہائی سستی اور آسان ہے

آپ کو اپنے چہرے کو بھاپ دینے کے لیے کسی پروفیشنل ایکسپرٹ کی ضرورت نہیں ہے اور نہ ہی کسی بیوٹی پارلر جانے کی ضرورت ہے آپ اسے گھر میں سہولت کیساتھ کسی بھی وقت اور کسی بھی جگہ پر لے سکتے ہیں۔