ہمارے باورچی خانے میں عام طور پر 5 سے 20 مصالحے استعمال کیے جاتے ہیں جنہیں ہم بازار سے خرید کر استعمال کر لیتے ہیں اور ہم میں سے بہت سے لوگ اس بات سے ناواقف ہوتےہیں کہ یہ مصالحے جن پودوں پر اُگتے ہیں وہ پودے کیسے ہیں۔

باورچی خانے میں چینی بھی استعمال ہوتی ہے اور مثل مشہور ہے کہ جب کوئی آدمی چینی کی مل میں چینی بنتے دیکھ لے تو پھر اُس کا چینی کھانے کو دل نہیں کرتا مگر اس اس آرٹیکل میں ہم قُدرت کے اُن حسین پودوں اور اُن کے تعارف کو شامل کر رہے ہیں جن پر ہمارے کھانوں کو مزیدار بنانے والے مصالحے اُگتے ہیں اور ہمیں پُوری اُمید ہے کہ ان پودوں کو دیکھ کر آپ کا دل باغ باغ ہوجائے گا۔

نمبر 1 لونگ

لونگ کے پودے پر اُگنے والے لونگ پُھولوں کے بڈز ہیں جو انتہائی خُشبودار اورذائقے دار ہونے کے ساتھ ساتھ انسانی صحت کے لیے بیشمار خوبیوں کے حامل ہیں۔ لونگ کا پودا ملاکو آئی لینڈ ملائشیا میں پیدا ہُوا مگر اب ساری دُنیا میں ہی اسے کاشت کیا جارہا ہے اور دُنیا کے مختلف خطوں میں کاشت ہونے کی وجہ سے لونگ ساری دُنیا میں سارا سال میسر ہوتے ہیں۔

نمبر 2 زعفران

کیسر کے پُھولوں سے حاصل ہونے والا زعفران انتہائی قیمتی اور خُوشبودار مصالحہ ہے جسے بہت سے کھانوں کو مزیدار اور خُشبودار بنانے کے لیے استعمال کیا جاتا ہے ، کیسر کے یہ پھول کشمیر میں بڑی تعداد میں اُگتے ہیں اور کشمیر کے علاوہ ایران میں بھی اس پودے کو بڑے پیمانے پر کاشت کیا جاتا ہے۔

نمبر 3 زیرہ

زیرے کا پودا ساوتھ ویسٹ ایشیا کے ساتھ ساتھ مڈل ایسٹ میں بھی پیدا ہوتا ہے اور اس کے انتہائی خُشبودار اور کھانوں کے ذائقے کو چار چاند لگانے والے بیج ہم تقریباً اپنے ہر کھانے میں استعمال کرتے ہیں۔

نمبر 4 پُھول بادیان

بادیان کے پودے کا گھر ویت نام اور چائنہ ہے مگر اب اسے دُنیا میں اور بھی کئی مُلکوں میں اُگایا جارہا ہے اور اس پودے پر اُگنے والے ستاروں کی شکل کے اس پودے کے بییج پاکستان اور انڈیا سمیت دُنیا کے مختلف ملکوں میں کھانوں کو ذائقے دار اور خُشبودار بنانے کے لیے بطور مصالحہ استعمال ہوتے ہیں۔

نمبر 5 بڑی الائچی

بڑی الائچی ہمارے بہت سے کھانوں کو مزیدار بناتی ہے خاص طور پر پلاؤ چاول تو اس کے بغیر نا مکمل ہوتے ہیں، بڑی الائچی کو جب پودے سے علیحدہ کیا جاتا ہے تو یہ سبز رنگ کی چھوٹی چھوٹی گیندوں کی طرح ہوتی ہے جسے بعد میں ایک خاص طریقے سے خُشک کر کے بطور مصالحہ استعمال کیا جاتا ہے۔

نمبر 6 سُرخ مرچ

ہمارا کوئی بھی سالن سُرخ مرچ کے بغیر نامکمل اور ادھورا ہوتا ہے، اس پودے کا آبائی گھر میکسیکو تھا مگر اب اسے ساری دُنیا میں ہی کاشت کیا جاتا ہے اور پھر اسے دُھوپ میں خُشک کرکے پیس کر پاوڈر بنایا جاتا ہے۔

نمبر 7 ہلدی

ہلدی کا پودا ادرک کے خاندان کا ایک پودا ہے اور ہلدی کے پودے کی جڑیں خُشک کر کے پیس کر ہلدی پاؤڈر بنتا ہے جو ہم اپنے تمام کھانوں میں خُوبصورت ذائقے اور رنگ کے لیے بطور مصالحہ استعمال کرتے ہیں۔

نمبر 8 دارچینی

دارچینی کی بہت سے اقسام ہیں اور یہ تمام اقسام دارچینی کے پودے کے تنے کے اندرونی حصے سے حاصل کی جاتی ہیں جسے پیپر کی طرح لپیٹ کر خُشک کر لیا جاتا ہے اور بعد میں پیس کر دارچینی پاوڈر بنایا جاتا ہے جو ہم بطور مصالحہ اپنے ہر باورچی کھانے میں رکھتے ہیں اور سارا سال اس مصالحے کو استعمال کرتے ہیں۔

نمبر 9 سفید تل

سیساموم کا یہ پھول دار پودا ہمارے لیے سفید تل بناتا ہے اس پودے کا آبائی گھر افریقہ میں تھا مگر پھر اسے بعد میں انڈیا اور اب دُنیا کے اور بھی کئی مُلکوں میں کاشت کیا جاتا ہے اور اس کے بیجوں کو ہم اپنے کھانوں میں مختلف طرح استعمال کرتے ہیں۔

نمبر 10 جائفل

جائفل مائریسٹکا پودے کا بیج ہے جوبے شمار مقاصد کے لیے استعمال ہوتا ہے مگر عام طور پر اس کا تیل نکالا جاتا ہے اور اسے خُشک کر کے پیس کر کھانوں میں بطور مصالحہ استعمال کیا جاتا ہے۔

نمبر 11 مسٹرڈ پیسٹ

سرسوں پنجاب میں اُگنے والا ایک عام پودا ہے جو عام طور پر موسم سرما اور بہار میں رنگ کھلاتا ہے اور اس کے پتوں کو ہم پکا کر ساگ بناتے ہیں اور اس کے پھُولوں اور بیجوں سے تیل اور مسٹرڈ پیسٹ بنانے کے علاوہ بھی بہت سے چیزیں بنائی جاتی ہیں۔

نمبر 12 سونف

خُوبصورت پیلے رنگ کے پھُولوں والے رنگ کھلاتے سونف کے پودے کا یہ پھل سونف بیشمار خُوبیوں کا حامل ہے اور اپنی افادیت کی وجہ سے ساری دُنیا میں ہی کاشت کیا جاتا ہے۔

نمبر 13 لہسن

لہسن کا کوئی ثانی نہیں کیونکہ یہ مصالحہ بھی ہے اور سبزی بھی اور ساری دُنیا میں اسے کاشت کیا جاتا ہے اور مطور مصالحہ استعمال کرنے کے لیے اسے پہلے خاص طریقے سے خُشک کیا جاتا ہے اور پھر پیس کر اسکا پاوڈر بنایا جاتا ہے۔

نمبر 14 میتھی دانہ

میتھی کے پودے کے پتے جہاں پکا کر مزیدار سبزی بنائی جاتی ہے وہاں میتھی کے بیج بھی بیشمار مقاصد کے لیے استعمال ہوتے ہیں میتھی کے بیجوں سے تیل بھی نکالا جاتا ہے اور اسے بطور مصالحہ بھی استعمال کیا جاتا ہے۔

نمبر 15 کالی مرچ

کالی مرچ کا  پودا بھی اب ساری دُنیا میں کاشت کیا جاتا ہے اور اس کو خُشک کر کے بعد میں بطور مصالحہ استعمال کیا جاتا ہے جسے دُنیا بھر کے شیف حضرات اپنے کھانے کے ذائقے کو دوبالا کرنے کے لیے استعمال کرتے ہیں۔