ذہین لوگ جب بھی بازار سے کوئی کھانے پینے کی چیز خریدتے ہیں تو اُس پر درج ایکسپائری ڈیٹ کو بھی ضرور دیکھتے ہیں تاکہ شے کی تازگی کا اندازہ ہوسکے لیکن بہت کم لوگ ہیں جو یہ بھی جانتے ہیں کہ اُن کے روز مرہ استعمال کی چیزیں بھی ایک خاص وقت کے بعد ایکسپائر ہوجاتی ہیں مثلا تکیے، جُوتے، تولیہ، ٹوتھ بُرش وغیرہ۔

اس آرٹیکل میں گھریلو استعمال کی چیزوں کو کتنا عرصہ استعمال کرنا مناسب ہے اور وہ کب ایکسپائر ہوں گی ذکر کیا جائے گا تاکہ ہمیں ان باتوں سے آگاہی ہو اور ہماری طبیعت میں نفاست پیدا ہو۔

نمبر 1 تکیے

وقت گُزرنے کیساتھ تکیے میں مٹی اور دُھول جمتی جاتی ہے اور بار بار استعمال سے تکیے کی ساخت میں تبدیلی واقع ہوجاتی ہے اور اس بے شکل تکیے کا استعمال جہاں گردن درد کا باعث بن سکتا ہے وہاں الرجی بھی پیدا کر سکتا ہےلہذا تکیے کو دو سے تین سال استعمال کرنے کے بعد فارغ کر دینا چاہیے یا اگر تکیے میں روئی بھری ہے تو روئی کو پنجا کر دوبارہ بھریں۔

نمبر 2 جوگرز

جوگرز بنانے والی کمپنیاں عام طور پر جوگرز کے اوپر اُن کی ایکسپائری درج نہیں کرتیں لیکن ایک پائدار جوگر عام طور پر 4 سو سے 5 سو کلومیٹر کے بعد خراب ہونا شروع ہوجاتا ہے اور اسی طرح جوگر میں استعمال ہونے والا میٹریل چمڑا وغیرہ بھی 1 سے 2 سال کی مُدت کے بعد ایکسپائر ہو جاتا ہے۔

نمبر 3 بچوں کی چُوسنی

بچوں کی یہ چُوسنی لیٹکس کے ساتھ بنائی جاتی ہے اور لیٹکس وقت کے ساتھ اپنی ساخت بدلتا ہے اور اس پر کریکس پیدا ہوجاتے ہیں جن میں جراثیم پروان چڑھتے ہیں اس لیے بچوں کے زیر استعمال چُوسنی وغیرہ کو ہر 5 پانچ ہفتے کے بعد تبدیل کر دینا چاہیے۔

نمبر 4 پرفیومز

ایوڈی پرفیوم اور ایو ڈی ٹوائیلٹ وغیرہ کی خُوشبو اگر بوتل ڈبے میں پیک بند ہے تو 3 سال اور اگر کُھلی ہے تو 2 سال کے اندر استعمال کر لیں اس کے بعد پرفیوم کی خوشبو ماند پڑنی شروع ہو جاتی ہے۔

نمبر 5 بالوں کے بُرش

بالوں کے بُرش کی ریگولر صفائی بہت ضروری ہے اور انہیں ایک سال سے زیادہ استعمال نہیں کرنا چاہیے کیونکہ بُرش کے دندانے اپنی ساخت بدل لیتے ہیں جس سے بالوں میں کنگھی کرنا دُشوار ہوجاتا ہے اور بال ٹُوٹتے ہیں۔

نمبر 6 ٹُوتھ برش

ٹُوتھ بُرش کو جب اُس کے دندانے خراب ہوں فوراً بدل لینا چاہیے یا کم از کم 3 ماہ میں ایک دفعہ ضرور بدلنا چاہیے اور خاص طور پر جب آپ نزلہ زکام وغیرہ میں مُبتلا ہوں تو ٹُوتھ برش بدل دیں تاکہ دوبارہ بیمار نہ ہوں۔

نمبر 7 ہائیڈروجن پر آکسائیڈ

ہائیڈروجن پر آکسائیڈ گھر میں کئی طرح فائدہ دیتی ہے اور عام طور پر جب اس کی بوتل کو کھول لیا جاتا ہے تو یہ 2 مہینے میں پانی بن جاتی ہے اور سیل پیک بوتل ایک سال تک استعمال کی جاسکتی ہے۔

نمبر 8 کچن سپونج

صفائی کرنے والے یہ سپونج اور شاور پف وغیرہ کے اندر فنگس اور مولڈ پیدا ہونا شروع کر دیتی ہے اس لیے انہیں 2ہفتے کے بعد تبدیل کر دینا چاہیے۔

نمبر 9 سلیپرز

پاؤں میں فنگس انفیکشن پیدا کرنے میں سلیپرز کا کوئی جواب نہیں اس لیے انہیں 6 ماہ بعد تبدیل کر دینا چاہیے اور ہر ہفتے اچھی طرح دھو کر استعمال کرنا چاہیے۔

نمبر 10 کچن کے مصالحے اور آٹا

کچن کے مصالحے تین سال تک استعمال کے قابل رہتے ہیں اور آٹا اگر اچھی طرح ہوا بند جگہ پر محفوظ کیا گیا ہے تو 6 ماہ سے ایک سال تک استعمال کے قابل رہتا ہے۔

نمبر 11 مچھر مار سپرے

مچھر مار سپرے خریدتے وقت بھی اس پر درج ایکسپائری ڈیٹ کا مطالعہ ضرور کریں کیونکہ پیکینگ کے 2 سال بعد سپرے کی لائف ختم ہونا شروع ہوجاتی ہے۔

نمبر 12 برتن دھونے کا لیکوڈ صابن

لیکوڈ صابن کی شیلف لائف 2 سال تک ہوتی ہے مگر بوتل کھولنے کے بعد اسے 1 سے 2 مہینے کے بعد استعمال نہیں کرنا چاہیے۔

نمبر 13 نہانے کا صابن

نہانے کے صابن کی شیلف لائف 2 سے 3 سال تک ہوتی ہے لیکن اگر آپ پُرانا صابن استعمال کر رہے ہیں اور وہ جھاگ بنا رہا ہے تو ہپ ہپ ہُرے اُسے استعمال کیا جاسکتا ہے۔