Posted by پاکستان میں عام طور پر 21 توپوں کی سلامی چودہ اگست اور دیگر ریاستی اور سرکاری دنوں کے موقع پر دی جاتی ہے۔
21 توپوں کی سلامی پاکستانی کے علاوہ بھارت ، امریکہ ، برطانیہ، اور تقریبا ًدنیا کے تمام ممالک میں سرکاری دنوں پر دی جاتی ہے۔
سلامی دینے کا یہ انداز کب شروع ہُوا اس کے متعلق تاریخ میں کوئی مصدقہ جواب نہیں ملے گا جس کو تسلیم کیا جائے لیکن عام طور پر خیال کیا جاتا ہے کہ توپوں کی سلامی کا آغاز قرون وسطی کے زمانے سے شروع ہُوا جب توپوں کو جنگی مقاصد کے لیے استعمال کیا جانے لگا تب بحری افواج جب کسی ساحل پر لنگر انداز ہوتیں تو ساحل پر پہنچ کر خالی توپوں کو چلایا جاتا جس کا مطلب یہ سمجھا جاتا تھا کہ یہ بحری بیڑہ اس ساحل پر لڑائی کی غرض سے نہیں آیا۔
چودویں صدی میں توپوں کی یہ سلامی دینے کا آغاز تاجروں نے بھی شروع کیا جب وہ اپنے مال بردار بحری جہاز کے ساتھ کسی ملک کے ساحل پر لنگر انداز ہوتے تو پہلے جہاز سے 7 توپوں کی سلامی پیش کرتے، جس کا مطلب امن اور تجارتی جہاز کے لنگر انداز ہونے کا پیغام سمجھا جاتا تھا۔
توپوں کی اس سلامی میں سات کا ہندسہ کیوں استعمال کیا جاتا تھا اس کے متعلق بھی کوئی حتمی تاریخ موجود نہیں، شروع شروع میں 7 توپوں کی سلامی پیش کی جاتی تھی پھر جیسے جیسے بحری جہاز بڑے ہوتے گئے تاجروں نے اُن پر مزید توپیں استعمال کرنا شروع کیں اور پھر یہ روایت 21 توپوں تک چلی گئی۔
سرکاری طور پر سب سے پہلے برطانیہ کی فوج نے 1730 میں برطانوی شاہی خاندان کے اعزاز میں 21 توپوں کو چلایا اور پھر دُنیا بھر میں سرکاری طور پر خوشی منانے کے لیے 21 توپوں کی سلامی کی روایت پڑ گئی۔
برطانوی شاہی خاندان کو توپوں کے اس سیلوٹ کے بعد برطانیہ میں اہم سرکاری دنوں پر توپوں کی اس سلامی کو لازمی قرار دے دیا گیا اسی روایت سے متاثر ہوکر امریکہ میں 1842 میں صدر مملکت کے لیے پہلی بار 21 توپوں کی سلامی پیش کی گئی۔
19ویں صدی میں جب کوئی ملک کسی علاقے پر قابض ہوتا تھا تو بھی خالی توپوں کو چلا کر دُشمن پر رعب ڈالا جاتا تھا ، یہ روایت آج بھی سیاچن میں پاکستانی اور بھارتی افواج استعمال کرتی ہے اور ایک دوسرے پر خالی توپیں چلائی جاتی ہیں تاکہ افواج کا رعب برقرار رہے۔