ہماری خوراک ہمارے جسم پر اثرات پیدا کرتی ہے اور جس وقت درجہ حرارت گرتا ہے اور سردی میں اضافہ ہوتا ہے تو ہمیں جسم پر ایسے اثرات کی ضرورت ہوتی ہے جو اسے گرم رکھ سکیں تاکہ یہ سردی سے بچا رہے۔

تھرموجینسس کیا ہے؟

ایسے کھانے جو کھائے جانے کے بعد فوری ہضم نہیں ہوتے ہمارے خون کے درجہ حرارت کو تیز کرتے ہیں اور یہ تیز ہونے والا درجہ حرارت ہمیں سردی سے بچاتا ہے، اس عمل کو میڈیکل سائنس میں تھرموجینسس کہا جاتا ہے اور اسکے لیے ایسے کھانوں کا انتخاب کرنا چاہیے جو اچھی چکنائی ، پروٹین اور کاربوہائیڈریٹ جیسی غذائی صلاحیت سے بھرپُور ہوں۔

اس آرٹیکل میں غذائی صلاحیت سے بھر پُور 8 ایسے کھانوں کو شامل کیا جارہا ہے جو جسم کے درجہ حرارت کو گرنے نہیں دیتے اور اسے سردیوں میں گرم رکھتے ہیں۔

نمبر 1 کیلا

کیلا دیگر غذائی صلاحیتوں کیساتھ ساتھ وٹامن بی اور میگنشیم سے بھرپُور پھل ہے اور یہ وٹامنز اور منرلز ہمارے تھائی رائیڈ اور ایڈرینل گلانڈز کو ٹھیک طریقے سے کام کرنے میں انتہائی مدد گار ہیں اور یہ دونوں گلانڈز خُون کے درجہ حرارت کو نارمل رکھنے میں مدد کرتے ہیں۔

کیلا نہ صرف آپ کو سردی لگنے نہیں دیتا بلکہ یہ آپ کے مُوڈ اور اچھی یاداشت کو بہتر بناتا ہے جس سے آپ سرد موسم سے اچھے طریقے سے لُطف اندوز ہوتے ہیں۔

نمبر 2 ادرک کی چائے

ادرک کا گرم قہوہ آپ کے جسم کو سخت سردی میں گرم رکھتا ہے، ادرک ہمارے نظام انہظام کو بہتر بناتا ہے اور تھرموجینسس کے عمل کو توانائی فراہم کرتا ہے جس سے جسم گرم رہتا ہے۔

نمبر 3 جّو کا دلیہ

سردیوں میں اپنے ناشتے میں جّو کا دلیہ لازمی شامل کریں یہ آپکے کولیسٹرال کو بہتر بنائے گا اور اس میں موجود فائبر ہضم کی صلاحیت کو تقویت دے گی اور آپ کے معدے کو بھرا رکھے گی جس سے جسم کو نا صرف اپنا درجہ حرارت نارمل رکھنےمیں مدد ملے گی بلکہ بیشمار اور فائدے حاصل ہوں گے۔

نمبر 4 چائے اور کافی

یہ دونوں مشروب ہمارے جسم کو کیفین مہیا کرتے ہیں اور کیفین جسم کا میٹابولیزم تیز کرتی ہے اور ہمیں سردی میں گرم رکھتی ہے۔

نمبر 5 سُرخ گوشت

بکرے اور گائے وغیرہ کا گوشت آئرن حاصل کرنے کا ایک بڑا ذریعہ ہے اور آئرن ہمارے خُون میں آکسیجن کی سپلائی بہتر بناتا ہے اور ایسے افراد جن میں آئرن کی کمی ہوتی ہے سردیوں میں اُن کے ہاتھ اور پیر جلدی ٹھنڈے ہو جاتے ہیں اور وہ جلدی تھکاؤت اور عام افراد سے زیادہ سردی محسوس کرتے ہیں۔

نمبر 6 شکر قندی

شکر قندی اور دُوسری رُوٹ ویجیٹیبلز کو نظام انہظام سے گُزرنے کے لیے زیادہ توانائی کی ضرورت ہوتی ہے اور اس عمل کے دوران جسم میں زیادہ حرارت پیدا ہوتا ہے جو ہمیں گرم رکھتاہے۔

نمبر 7 خُشک میوہ جات

بادام، اخروٹ، کاجو وغیرہ سردیوں میں ہمارے جسم کی غذائی ضروریات کو پُورا رکھنے میں اہم کردار ادا کرتے ہیں اور توانائی سے بھرپُور یہ میوہ جات ہمارے جسم کو صحت مند رکھنے اور موسم کی سختی سے بچانے میں انتہائی مددگار ثابت ہوتے ہیں۔

نمبر 8 پانی

سردی میں عام پر پیاس کم لگتی ہے لیکن سردی ہو یا گرمی روزانہ کم از کم آٹھ گلاس پانی پینا بہت ضروری ہے، پانی ہمارے جسم کے اعمال کو فعال رکھنے میں مدد کرتا ہے اور ہمارے جسم کو ڈی ہائیڈریٹ نہیں ہونے دیتا۔

ڈی ہائیڈریشن جسم کے درجہ حرارت کو فوری طور پر ٹھنڈا کر دیتی ہے اور ہائیپوتھرمیا جیسی بیماری کا خطرہ بڑھ جاتا ہے اس لیے سردیوں میں روزانہ مناسب پانی ضرور پینا چاہیے۔